Foto: Oblys ákimdiginiń baspasóz qyzmeti
Biyl qyrkúiek aiynda Astana qalasynda 5-shi Dúniejúzilik kóshpendiler oiyny ótedi. Atalǵan sharaǵa sportshylardan bólek, oblys ónerpazdary da atsalyspaq. Onda úzdik qolóner sheberleri ónimderin usynyp, aqyndar aitysy, salt-dástúrdi nasihattaityn qoiylymdar sahnalady. Óńirdiń týristik áleýeti tanystyrylady. Kontserttik baǵdarlama usynylady. Bul týraly búgin oblys ákimi Darhan Satybaldynyń tóraǵalyǵymen ótken apparat májiliste baiandaldy. Óńir basshysy josparly is-sharalardan bólek, erekshe formatta tyń serpilis kerektigin aitty, dep habarlaidy "Ult aqparat" oblys ákimdiginiń baspasóz qyzmetine silteme jasap.
– Túrkistanǵa búginde tek elimizdiń ǵana emes, álemniń ár túkpirinen qyzyǵýshylyq bildirýde. Sondyqtan da bizge kelýshi azamattar óńirimizdiń rýhani-mádeni ómirimen tanysady. Ol úshin tek oblys ortalyǵynda ǵana emes, árbir aýdan, qalanyń óz brendi bolýy tiis. Rýhani astanamyzdyń tórindegi barlyq is-sharadan ulttyq boiaýdyń, tól ónerdiń bólshegi alystan baiqalyp turǵany jón. Aldaǵy ýaqytta is-sharalar mazmunyna basa nazar aýdaryp, qaita qarańyzdar, – degen oblys ákimi jaýaptylarǵa birqatar mindetter júktedi.
Budan bólek, Túrkistan óńirinde is-sharalar legi josparǵa sai jalǵasady. Oblystyq mádeniet basqarmasynyń basshysy Ázimhan Qoilybaev baiandama jasap, birqataryna toqtalyp ótti. Jyl saiyn ótkiziletin «Ónerli ólke» oblystyq óner festivaline biyl ózgerister engizilgen. Aýdan, qala ónerpazdary byltyrǵydai úsh kún emes, eki kún boiy oblys ortalyǵynda óner kórsetedi. Sondai-aq, aýaraiyna bailanysty arnaiy bekitilgen kestege sáikes eki kezeńde ótkiziledi. Tamyz aiynyń 14-inen bastap qalǵan aýdan, qala ónerpazdary qyrkúiek aiynyń sońyna deiin jalǵastyrady. Alǵashqy kúni «Etnoaýyl» kesheninde ónerpazdar salt-dástúrlerden kórinister, qolónershiler kórmesi, ulttyq naqyshtaǵy qoiylymdar qoiyp, ulttyq oiyndardardy nasihattasa, kelesi kúni kópshilik nazaryna «Kerýen sarai» aýmaǵynda gala-kontsert usynylady.
Merekelik is-sharalardan bólek, kúz ailarynda otandyq jáne sheteldik ǵalymdardyń qatysýymen «Qoja Ahmet Iasaýi murasyna jańa kózqaras» halyqaralyq konferentsiiasy, respýblikalyq «Túrkistan daýysy» án baiqaýy, sonymen qatar Respýblika kúni qarsańynda dástúrli «Voice of Turan» halyqaralyq qazaq ánderin oryndaýshylar baiqaýy ótkiziledi.
Oblystyq kitaphanada barlyq aýdan, qalalarynda oqyrmandy kitap oqýǵa tartý maqsatynda uiymdastyrylǵan «Álemdi kitap arqyly tanimyn», «Bir el – bir kitap», «12 aida – 12 kitap», «Aqyldymmen aqyldymyn», «Oqyrman izdeimiz» jobalarynyń qorytyndysy ótkizý josparlanýda. Qazan aiynda «Tildi oqytýdaǵy ózekti máseleler» respýblikalyq ádistemelik seminar uiymdastyrylyp, seminarǵa respýblikalyq «Til qazyna» ortalyǵynyń mamandary men osy salanyń bilikti sarapshylary shaqyrylady dep kútilýde.
