Foto: Gov.kz
Prezident Ordabasy aýdanynda «JNRAY Group» seriktestigi biyl iske qosqan tigin fabrikasynyń jumysymen tanysty, dep habarlaidy «Ult aqparat».
Aýmaǵy 6 myń sharshy metr bolatyn jeńil ónerkásip nysanyn ashýǵa memlekettik indýstriialandyrý baǵdarlamasy aiasynda 1,4 milliard teńge kóleminde qarjylai qoldaý kórsetilgen.
Qasym-Jomart Toqaevqa fabrikada kiim-keshek, tósek jabdyqtary jáne arnaiy kiim túrleri shyǵarylatyny jóninde málimet berildi. Búginde kásiporynda 300 adam jumys isteidi. Keleshekte ónim túrlerin kóbeitip, tiginshiler sanyn 500-ge deiin jetkizý josparlanǵan. Qajetti shikizat kórshiles Ózbekstan men Qyrǵyzstan elderinen jetkiziledi.
Memleket basshysy tigin tsehyn aralap kórip, ónim úlgilerimen tanysty.
Memleket basshysy Ordabasy aýdanynyń Badam aýylynda ornalasqan «Bórte Milka» JShS taýarly sút fermasyn aralap kórdi.
2016 jyly negizi qalanǵan bul kásiporyn Soltústik Qazaqstan oblysynyń tájiribesi negizinde biyl 403 bas siyr satyp aldy. Nátijesinde qosymsha 15 jańa jumys orny ashyldy.
Jobaǵa memleketten jyldyq mólsherlemesi 2,5 paiyz bolatyn jeńildetilgen 2,4 milliard teńge nesie berildi. Búginde qurylys jumystary tolyq aiaqtaldy. Ferma «DeLaval» shved tehnologiialyq keshenimen jabdyqtalǵan.
Ferma táýligine 25 tonna sút óńdep, 20-dan astam ónim túrin shyǵarady. Kásiporynnyń taýary negizinen Túrkistan, Qyzylorda, Jambyl oblystaryna, sondai-aq Shymkent, Almaty qalalaryna jetkiziledi.
«SPK TURKISTAN» óndiristik parkinde uiymdastyrylǵan kórmege et, sút jáne balyq ónimderi, sýsyn, balmuzdaq, shokolad túrleri, sondai-aq iri aýyl sharýashylyǵy birlestikteri ósirgen jemis-jidekter men kókónister qoiylǵan.
Prezidentke óńirde agroónerkásip keshenin damytýdyń negizgi baǵyttary tanystyryldy. Atap aitqanda, oblysta aýyl sharýashylyǵy daqyldarynyń ónimdiligin arttyrýǵa, sý únemdeý tehnologiialaryn engizýge, jylyjailardy kóbeitýge jáne investitsiialyq jobalardy júzege asyrýǵa den qoiylmaq. 2030 jylǵa qarai óńirde sýarmaly jerlerdiń 40 paiyzyna sý únemdeý tehnologiialary engizilip, aýmaǵy 602 gektardy quraityn jańa jylyjai keshenderi iske qosylady. Sonymen qatar aldaǵy úsh jylda 105 investitsiialyq jobany júzege asyrý arqyly 8 myńnan astam jańa jumys ornyn ashý kózdelgen.
Qasym-Jomart Toqaev kásipkerlermen áńgimelesip, aýyl sharýashylyǵynyń ónimdiligin arttyrý máselesi jóninde pikir almasty.
– Jumys óte sátti júzege asyrylyp jatyr eken. Úkimet óńirge kómek kórsetedi. Túrkistan oblysynyń jaǵdaiy jaman emes. Ákim jaqsy jumys istep jatyr. Qolynan is keledi. Sondyqtan oblystyń keleshegi zor dep oilaimyn. Barshańyzǵa sáttilik tileimin, – dedi Prezident.
Budan bólek, Memleket basshysy sý únemdeý tehnologiiasyn engizýdiń mańyzdy ekenine nazar aýdardy.
