Foto: okg.kz
Qazyǵurt aýdanynyń ákimshilik ortalyǵy – Qazyǵurt aýylynda issaparda bolǵanymyzda, Qonaev kóshesiniń boiynda qurylysy júrip jatqan eki qabatty bes turǵyn úige de at basyn burǵanbyz. «Bolashaq» ataýy berilgen bul shaǵynaýdanda qazir balalardyń óner ortalyǵy, keremet sport kesheni, kópqabatty turǵyn úiler, kommertsiialyq nysandar paida bolǵan.
– Qazyǵurt aýdanynyń qurylys bóliminiń ótinimi boiynsha Túrkistan oblysynyń memlekettik satyp alý departamenti jalǵa beriletin turǵyn úi qurylysy boiynsha tender ótkizgende jeńimpaz shymkenttik «Ýrba-standart» jaýapkershiligi shekteýli seriktestigi boldy. Ony kásipker Qasymjan Bólekbaev basqarady. Investor qurylysty óz qarjysyna salyp, bitken soń memleketke satady. Satyp alýǵa oblystyq biýdjetten arnaiy qarjy bólinip qoiylǵan. Jalpy, 40 páterden turatyn 5 baspana turǵyn úi-kommýnaldyq sharýashylyq bóliminde kezekte turǵandarǵa berilmek. Bizdiń mindet – qurylysy bitken úidi qabyldap alyp, tiisti bólimge ótkizý. Ári qarai komissiia qorytyndysymen turǵyndarǵa paidalanýǵa beriledi, – dep túsindirdi bizge Qazyǵurt aýdandyq qurylys, sáýlet jáne qala qurylysy bóliminiń basshysy Ermek Mombekov.
Onyń aitýynsha, halyqtyń suranysyn qanaǵattandyrý maqsatynda turǵyn úiler kóptep salynyp jatyr. Máselen, 2018 jyly Qazyǵurtta eki qabatty tórt turǵyn úi tapsyrylsa, 2022 jyly taǵy eki qabatty úi óz ielerin tapqan. Biraq, turǵyn úidiń kezegi azaiǵan joq. Kerisinshe, ósip jatyr. Qazirgi ýaqytta 1486 adam baspana kezeginde tur. Elimizdegi «Nurly jer» baǵdarlamasy osyndai áleýmettik máseleni sheshýge baǵyttalǵan. Alaida, satyp alý quqyǵymen jalǵa beriletin turǵyn úi jurttyń barlyǵyna birdei arnalmaǵan. Oǵan kóp balaly jáne tolyq emes otbasylar, sondai-aq múgedek balalary bar otbasylar, jetim balalar, ata-anasynyń qamqorlyǵynsyz qalǵan balalar, oralmandar, memlekettik qyzmetshiler, áskeri qyzmetshiler, arnaýly memlekettik organdardyń qyzmetkerleri, biýdjettik uiymdardyń (bilim berý jáne densaýlyq saqtaý) qyzmetkerleri, 1 jáne 2-toptaǵy múgedekter qatysa alady.
Atalǵan qurylysqa búginde aýyz sý júiesi tolyq tartyldy. Jylý men elektr jaryǵy júrgizildi. Endi gaz jelisi tartylady. Qazir árleý jumystary aiaqtalýǵa jaqyn. Aýdan ortalyǵynda ortalyqtandyrylǵan káriz júiesi joq. Sondyqtan ony osy shaǵynaýdanda septik almastyrady, ol, árine, barlyq sanitarlyq normalarǵa sáikes bolýy tiis. Qurylys qarasha aiynda aiaqtalady dep josparlanyp otyr.
Qabyrǵasy kúidirilgen kirpishten qalanǵan eki qabatty bes turǵyn úidiń árqaisysynda 8 páterden bar. Onyń ishinde bir bólmeden – eki, eki bólmeden – tórt, úsh bólmeden eki páter bar. Bir bólmeniń jalpy aýdany – 36 sharshy metr, eki bólmeli – 52 jáne 59 sharshy metr, úsh bólmeli 74 sharshy metrdi quraidy.
Qurylys biyl maýsym aiynda bastalypty. Negizgi berilgen normaǵa bailanysty alty aida bitpek. Kásipkerdiń senimdi ókili, bas injener Nurhan Turymbetovtiń aitýynsha, qazirgi tańda qurylys basynda 38 adam eńbek etýde. Búginde olar ishki árleý jáne qaptaý jumystaryn júrgizýde. Úiden tys elektr, sý qubyry, gaz jelileri ornatyldy. Páterlerde jylytý derbes bolady. Transformator ornatylyp qoiǵan, elektr qýaty barlyq bes úige qosylǵan. Ortalyq gaz qubyry qurylys alańynan nebári 400 metr, al, sý qubyry 100 metr qashyqtyqta ótedi. Úi mańyndaǵy aýmaqty abattandyrý jumystary da josparlanǵan. Salynǵan turǵyn úidi paidalanýǵa berýge deiingi barlyq qarjylyq shyǵyndardy jaýapkershiligi shekteýli seriktestik ózine alyp otyr.
N.Turymbetov qurylysqa negizinen otandyq ónimder paidalanylyp jatqanyn aitady. Bul da bolsa óz kásipkerlerimizge úlken kómek ekendigi daýsyz. Al, biz baspanaǵa zárý turǵyndardyń kóp uzamai kól-kósir qýanyshqa keneletinin, qonystoilar kóbeietinin oilap, kóńilimiz bir marqaiyp qaldy.
Ermek Elshibekuly turǵyn úi-kommýnaldyq infraqurylymdy damytýdyń 2023-2029 jyldarǵa arnalǵan tujyrymdamasy sheńberinde jyl saiyn qarjy bólinetinin aitty. «Osyǵan orai kezekte turǵan adamdardyń kóptigine bailanysty kelesi jyldary bul sharany ulǵaitsaq dep otyrmyz. Aldaǵy ýaqytta «Shyǵys» dep atalatyn jańa shaǵynaýdannyń qurylysy qolǵa alynady. Qazirdiń ózinde munda sýmen, gazben jabdyqtaý, elektr jelilerin salý jumystary júrgizilýde. Olardy aiaqtaǵan soń, biyl qarasha aiynyń sońynda munda jeke turǵyn úi salý úshin kezek boiynsha 385 adamǵa 9 sotyqtan jer telimi berilmek» deidi ol.
Jeke turǵyn úi, mádeni, áleýmettik, bilim berý nysandary salynǵan soń Qazyǵurtta taǵy bir jaily shaǵynaýdan paida bolatynyna jurt senimdi.
Baian DARǴOJINA,
«Ońtústik Qazaqstan».
