Foto: Gov.kz.
Túrkistan oblysyna investitsiia tartý jumystary jan-jaqty atqarylyp jatyr. Ol úshin shet memleketterdiń iri kompaniia ielerimen kezdesýler ótkizilip, kelissózder júrgizilýde, dep habarlaidy «Ult aqparat».
Túrkistan oblysy ákiminiń orynbasary Nuralhan Kósherov Qatar elinen kelgen «Trust for Trading Co» kompaniiasynyń bas direktory Saleh Djaber Al Marimen kezdesti. Júzdesýde taraptar sútti baǵyttaǵy túielerdi Túrkistan óńirine alyp kelý, ósirý jaiyn talqylady. Naqtyraq aitqanda, investorlar Qatar elinen túielerdi alyp kelip, baǵýdy, túielerdi jergilikti sharýalarǵa satýdy kózdep otyr. Ári qarai, jospar boiynsha, sharýlar túie sútin Túrkistan qalasynda ornalasqan «Golden Camel» zaýytyna ótkizedi. Osy rette, jergilikti sharýalarǵa jeńildetilgen nesie qarastyrý jaiy da qozǵaldy.
Qazirgi ýaqytta «Golden Camel» zaýyty túie sútin 850 teńgeden qabyldap, odan qurǵaq ónim jasap, ónimderin Qytaiǵa eksporttaýda. Zaýyt qabyldanatyn sút kólemin arttyrýdy kózdep otyrǵandyqtan, bul – jaqsy usynys.
Oblys ákiminiń orynbasary óńir ekonomikasyna oń áserin tigizetin, jańa jumys oryndaryn ashýǵa sep bolatyn árbir bastamaǵa qoldaý kórsetiletinin jetkizdi. Joba qolǵa alynǵan jaǵdaida tolyq infraqurylymmen qamtamasyz etilgen jer qarastyrylatynyn aitty. Aldaǵy ýaqytta bul joba jiti zerdelenip, qaralatyn bolady.
Trust for Trading Co – Qatar men Parsy shyǵanaǵy elderine mal men etti eksporttaýmen ainalysatyn Qatarda ornalasqan kompaniia. Bul iri halyqaralyq mal kompaniialarynyń biriniń enshiles kásiporny. Shtab-páteri Avstraliia, Túrkiia, Braziliia, Ýrýgvai, Rýmyniia jáne Iordaniiadaǵy kóptegen fermalarǵa tiesili. Sonymen qatar kompaniia Parsy shyǵanaǵy elderine, Iordaniiaǵa, Túrkiiaǵa, Indoneziiaǵa jáne Vetnamǵa iri qara men salqyndatylǵan et jetkizýshi bolyp tabylady.
Kompaniia importtyq eldiń talaptaryna sáikes mal, buzaý jáne qoi tasymaldaýǵa arnalǵan toǵyz alyp kemege ielik etedi. Shamamen 90 000 bas qoi men 12 000 bas buzaýdy tasymaldai alatyn úsh kemesi bar. Budan bólek, árqaisysy shamamen 30000 bas qoi men 4000 bas buzaýdy tasymaldaýǵa qabiletti alty kemesi bar.
