Túrkistan qalasynda Bekzat Sattarhanov atyndaǵy daryndy balalardyń sport mektebiniń jańa jobasy maquldandy.
Sattarhanov dańǵylynyń boiynan boi kóteretin ǵimarat zaman talabyna sai, ári shahardyń jańarǵan kelbetine sáikes salynbaq, dep habarlaidy "Ult aqparat".
Jańa nysannyń qurylysy jaqyn ýaqytta bastalyp, keler jyly paidalanýǵa berilmek. Aýmaǵy 320 oryndyq bolatyn sport kesheninde úlken zal men birneshe jattyǵý bólmeleri ornalasady dep josparlanǵan. «Jelilik saiabaq» boiynda, burynǵy ornynan qaita boi kóteretin záýlim keshenniń ainalasy tolyq abattandyrylyp, kógaldandyrylady.
Búgin oblys ákimi Ómirzaq Shókeev jańa sport kesheniniń jobasymen tanysyp, maquldady. Aimaq basshysy sondai-aq, Túrkistan qalasynda atqarylyp jatqan jumystardy pysyqtady. Qurylysshylarmen kezdesip, alańdarda saqtyq pen karantin sharttaryn kúsheitý kerektigin eskertti. Qajet bolǵan jaǵdaida táýlik boiǵy jumys kestesine kóshýdi tapsyrdy.
Oblys ákimi budan bólek Túrkistanda jańadan salynyp jatqan sáýleti erekshe meshit qurylysymen de tanysty. Qalaǵa kireberiste álemdegi ozyq tájiribelerdi ushtastyrǵan eńseli meshittiń qurylysyn Ózbekstan prezidenti Shavkat Mirzieev qoldaǵan.
Shyǵystyq naqyshta jasalǵan Islam ortalyǵynyń 20 myń sharshy metr aýmaqqa jaiǵasqan. Jańa ǵibadat ornynda 5 myń jamaǵat bir mezgilde sájdege bas tigizip, qulshylyq ete alady. Dini ǵimarat Uly Jibek joly boiymen kóne shaharǵa keletin týristerdiń qyzyǵýshylyǵyn arttyratyn taǵy bir nysan bolmaq. Aq meshitte musylmandyq joralardy jasaityn oryndar, kongress-holl, neke saraiy, 400 oryndyq medrese, kitaphana, ashana salynady dep kútilýde.
Al, ákimshilik-iskerlik ortalyǵynda qurylys jumystary júrip jatqan 38 kópqabatty turǵyn úilerdiń syrtqy qasbeti ashyq tústi travertin men aqshyl mármár taspen qaptalýda. Sattarhanov dańǵylynyń boiyndaǵy turǵyn úiler men ǵimarattardyń syrtqy kórinisi biryńǵai stilde jańartylýda.
Oblys ákimi «Jelilik saiabaqtyń» úshinshi kezeńiniń jumysyn da baqylady. 15 gektar aýmaqta 200-ge jýyq jumysshy men 80 tehnika jumyldyrylǵan. Ómirzaq Shókeev mádeni – rýhani ortalyqtaǵy qurylys basynda bolyp, «Kerýen sarai» turǵyn úi kesheninde atqarylyp jatqan jumystar barysyn aralap kórdi. Alańnyń aýmaǵy jasyl jelekke oranyp, velojoldar salynýda. Jaiaý júrginshilerge yńǵaily bolýy úshin jaryqshamdar men oryndyqtar qoiylyp, kógal, sý arnasy ótken demalys aimaǵyna ainalmaq.
