Foto: Gov.kz.
Túrkistan oblysynyń ákimi Darhan Satybaldynyń tóraǵalyǵymen ótken májiliste Túrkistan qalasynyń áleýmettik-ekonomikalyq damý boljamy talqylandy. Qalaǵa irgeles aýmaqtarda tarihi jáne kóne eskertkishterdiń ornalasýyna bailanysty týrizm damyp keledi, dep habarlaidy «Ult aqparat».
Arnaiy ekonomikalyq jáne indýstrialdy aimaqtardyń bolýy da oblys ortalyǵyn erekshelendirip otyr. Óńir basshysy qala damýyna qajetti infraqurylymnyń tómendigin alǵa tartyp, jan-jaqty jumystardy kúsheitýdi tapsyrdy.
– Túrkistan qalasyna erekshe mártebe berilýi de beker emes. Oblys ortalyǵynda halyq sany artyp keledi, jumys kúshi de jetkilikti. Barlyq jaǵynan damýǵa múmkindik bar. Halyqaralyq áýejaidyń salynýy, «Batys Evropa – Batys Qytai» avtodálizi men temirjol torabynyń boiynda ornalasýy týristerdi kóptep tartýǵa serpin beredi. Jýyrda ótken investitsiialyq forýmda biraz kelisim jasaldy. Sonyń ózi shahardyń ekonomikasyn kóterýge úles qosady. Biraq munymen shektelmei, investitsiia tartýdy toqtatpaý kerek. 2030 jylǵa qarai Túrkistan ózin-ózi qarjylandyratyn shaharǵa ainalýy tiis. Osy baǵytta jumysty kúsheitińizder, – dedi Darhan Satybaldy.
Jiyn barysynda Túrkistan qalasynyń ákimi Ázimbek Pazylbekuly baiandama jasady. Onyń aitýynsha, qala halqy 234 myńnan asty. Ekonomikalyq belsendisi 83 myńnan assa, onyń jumyspen qamtylǵany 80 myńǵa jýyqtaǵan. Sonyń ishinde ózin-ózi jumyspen qamtyǵandar 30 myń adamnan asyp otyr.
«Qalanyń jalpy óńirlik ónim kólemin 2030 jylǵa qarai 2,8 ese arttyramyz», deidi qala ákimi.
Sońǵy 4 jylda qala ekonomikasyna 1,3 trln. teńge investitsiia tartylǵan. Aldaǵy 6 jylda negizgi kapitalǵa baǵyttalǵan investitsiia kólemin 4,6 trln. teńgege jetkizý josparlanyp otyr.
Talqylaýda Túrkistan oblysynyń kásipkerlik jáne ónerkásip basqarmasy men Oblystyq týrizm basqarmasynyń basshylary baiandama jasap, usynystaryn jetkizdi.
Túrkistanda aldaǵy 6 jylda birqatar jobalar iske asyrylmaq. Josparly kezeńde 541 mlrd .teńgeni quraityn 7 myńnan asatyn jańa jumys ornymen 192 investitsiialyq jobanyń pýly jasaqtalǵan. Jalpy óńirlik ónim kólemi 2,8 ese ósip, 1,1 trln. teńgege, al tartylatyn investitsiia kólemi 3 ese ósip, 1,2 trln. teńgege ulǵaiady. Jergilikti túsim 44,2 mlrd. teńge nemese 2,2 ese ósip, 81,2 mlrd. teńgeni quraidy dep josparlanýda. Keletin syrtqy týrister sany 2 ese ósip, 20 myń adamǵa artady. Sonymen qatar jumyssyzdyq deńgeiin 4,7%-ǵa tómendetip, 22 myńǵa jýyq jumys oryndaryn ashý kózdelýde. Baspanamen qamtý boiynsha 2411 myń sharshy metr turǵyn úidi paidalanýǵa berý josparlanyp otyr. Sonymen qatar aldaǵy jyldary óńdeý ónerkásibi óniminiń kólemi arttyrý maqsatynda jalpy ónerkásip salasynda quny 142 mlrd. teńgeni quraityn, 3 575 jańa jumys ornyn ashýǵa múmkindik beretin, 34 joba qarastyrylýda. Arnaiy ekonomikalyq aimaǵynyń jalpy aýmaǵy – 180 ga. Onda jalpy quny 126 mlrd. teńgeni quraityn jáne 3 050 jańa jumys ornyn ashýǵa múmkindik beretin 15 jobany iske asyrý kózdelýde.
Indýstrialdy aimaqtyń aýmaǵy 190 gektardy quraidy. Búgingi tańda indýstrialdy aimaqta jalpy quny 10,5 mlrd. teńge bolatyn 954 jumys ornymen 21 joba iske asyrylǵan. Sonymen qatar aldaǵy jyldary quny 15,8 mlrd. teńge bolatyn jáne 525 adamdy jańa jumys ornymen qamtý múmkindigi bar 19 jobany iske asyrý josparlanýda.
Aldaǵy jyldary qurylys jumystarynyń kólemi jyldyq ortasha ósim 17 paiyz bolady dep boljamdanýda. Jeke investitsiialyq jobalar esebinen qurylys jumystaryna quny 243,9 mlrd. teńgeni quraityn, 2552 jańa jumys ornyn ashýǵa múmkindik beretin 136 joba qarastyrylýda. Qalanyń jalpy óńirlik óniminiń negizgi bóligin kóterme jáne bólshek saýda quraidy. Salaǵa 6 mlrd. teńgeni quraityn, 340 jumys ornyn ashýǵa múmkindik beretin 8 jobany uiymdastyrý kózdelgen.
Qalany damytýdyń negizgi basym baǵyty – týrizm. Salaǵa sońǵy 2 jylda 74,2 mlrd. teńge investitsiia tartylsa, biyl 53,5 mlrd. teńgege jetedi dep kózdelip otyr. Aldaǵy ýaqytta 145 mlrd. teńgeni quraityn, 955 jumys ornyn ashýǵa múmkindik beretin 13 jobany iske asyrý josparǵa engizilgen.
