Foto: Túrkistan oblysynyń ákimdigi
Qazaqstan Respýblikasy Prezidenti Ákimshiliginiń kelisimi boiynsha oblys ákiminiń ókimimen Ázimbek Pazylbekuly Túrkistan qalasynyń ákimi laýazymyna taǵaiyndaldy. Bul týraly óńir ákimdiginiń baspasóz qyzmeti habarlady.
Jańa ákimdi qalanyń aktivine oblys ákimi Darhan Satybaldy tanystyrdy.
Qalalyq máslihat depýtattary qala ákimi laýazymyna usynylǵan Ázimbek Pazylbekulynyń kandidatýrasyn qoldap, daýys berdi. Túrkistan oblysynyń ákimi Darhan Satybaldy shahardyń jańa basshysyna Túrkistan qalasyn damytý, Túrki áleminiń ortalyǵyna ainaldyrý, týristik jáne ekonomikalyq áleýetin kóterý baǵytynda mańyzdy mindetter júktelip otyrǵanyn aityp, aldaǵy jumysyna sáttilik tiledi.
Aita keteiik, Ázimbek Pazylbekuly 1991 jyly Qyzylorda oblysy, Jańaqorǵan aýdanynda dúniege kelgen. Bilimi – joǵary. Ál-Farabi atyndaǵy Qazaq ulttyq ýniversiteti, Qorqyt Ata atyndaǵy Qyzylorda memlekettik ýniversitetin, M.S.Nárikbaev atyndaǵy Qazaq memlekettik zań ýniversitetin jáne "Bolashaq" ýniversitetin bitirgen. Mamandyqtary – memlekettik jáne jergilikti basqarý, ekonomika, qurylys, quqyqtaný.
Eńbek jolyn 2013 jyly Qyzylorda qalalyq ishki saiasat bólimi jetekshi mamanynyń mindetin atqarýshy bolyp bastap, jetekshi maman, bas maman qyzmetterin atqarǵan. 2015 jyly Qyzylorda qalasynyń ákimi apparaty uiymdastyrý-inspektorlyq bóliminiń bas inspektory bolsa, odan keiin Qazaqstan Respýblikasy Ulttyq ekonomika ministrliginiń Qurylys, turǵyn úi-kommýnaldyq sharýashylyq isteri jáne jer resýrstaryn basqarý komitetiniń Kommýnaldyq sharýashylyq basqarmasynyń sarapshysy, bas sarapshysy bolyp eńbek etken. 2017 jyldan bastap Qazaqstan Respýblikasy Investitsiialar jáne damý ministrliginiń Qurylys jáne turǵyn úi-kommýnaldyq sharýashylyq isteri komiteti Kommýnaldyq sharýashylyq basqarmasynyń bas sarapshysy, basshysy bolyp jumys istegen.
Qazaqstan Respýblikasy Investitsiialar jáne damý ministrligi men Qazaqstan Respýblikasy Indýstriia jáne infraqurylymdyq damý ministrliginiń basqarmalaryn basqarǵan. Qazaqstan Respýblikasy Indýstriia jáne infraqurylymdyq damý ministrligi Qurylys jáne turǵyn úi-kommýnaldyq sharýashylyq isteri komiteti tóraǵasynyń orynbasary, Qazaqstan Respýblikasy Ónerkásip jáne qurylys ministrligi Qurylys jáne turǵyn úi-kommýnaldyq sharýashylyq isteri komiteti tóraǵasynyń orynbasary laýazymdaryn atqarǵan.
