Túrkistan oblysynyń ákimi Ómirzaq Shókeev Túrkistan qalasyn damytýdyń 1-kezeńin qorytyndylady, dep habarlaidy QazAqparat.
«Sońǵy 3 jylda atqarylǵan aýqymdy jumystar nátijesinde Túrkistan qalasyn damytýdyń 1-kezeńi aiaqtalyp, negizgi áleýmettik-infraqurylymy qalandy. Jalpy sońǵy 3 jylda 536 joba iske asyp, onyń 251 nysannyń qurylysy aiaqtalyp paidalanýǵa berildi. Halyqaralyq áýejai, ákimshilik-iskerlik jáne rýhani-mádeni ortalyqtary salyndy, olardy ózara bailanystyratyn dańǵyldar qaita jóndeýden ótti. Arnaiy ekonomikalyq jáne indýstrialdy aimaqtar quryldy», - dedi Ó. Shókeev Ortalyq kommýnikatsiialar qyzmetinde ótken baspasóz máslihatynda.
Ákimniń aitýynsha, qala kógildir otynmen jáne aýyz sýmen 100% qamtamasyz etilgen. Qalanyń ekologiialyq jaǵdaiyn jaqsartý maqsatynda Jasyl beldeý qurylyp, 13 myń ga jerge 3,5 mln túp aǵash egilgen.
«Aǵyn sý jaǵdaiy boiynsha Túrkistan qalasyna 234 mln tekshe metr aǵyn sý jetispeitin edi. Onyń sebebi – bar sýdy jinap, tolyqtai Túrkistanǵa deiin jetkizý máselesi qolǵa alynbaǵan edi. Ǵalymdar men aýyl aqsaqaldarynyń pikirlerin tyńdai kele, Túrkistan qalasyna 550 mln tekshe metr aǵyn sý jetkizýdiń jolyn taptyq. Birinshiden, «Túrkistan magistraldy kanalyn kúrdeli jóndeý» jobasy arqyly 60 mln tekshe metr sý únemdeledi jáne qala aýmaǵyndaǵy 8 shaqyrym kanal boiy abattandyrylady. Buryn aǵyn sý 43%-ǵa filtratsiialyq shyǵynǵa ushyrasa, búgingi kúni betondaý jumystarynyń 60 mln tekshe metr sý únemdeledi», - dedi Ó. Shókeev.
Ekinshiden, jańadan «Keńsai - Qosqorǵan - 2» sý qoimasyn salyndy. Bul qoima arqyly 31 mln tekshe metr aǵyn sý jetkiziledi. Bul – otyz jylda salynǵan óńirdegi birinshi sý qoimasy. Nátijesinde qazirgi tańda úlken toǵan biiktigi 26 metrge deiin kóterilip, 90% betonmen qaptaldy.
«Arys-Túrkistan magistraldyq arnasyn tolyqtyrý úshin Syrdariia ózeninen mashinalyq arna salý» arqyly 52 mln tekshe metr aǵyn sý jetkiziledi. Budan bólek, Jańadan «Sarqyrama» sý qoimasyn salý arqyly 65 mln tekshe metr aǵyn sý Túrkistanǵa jetkiziledi. Kentaý qalasynda sýdy tómendetý júiesin salý jobasy arqyly 40 mln tekshe metr aǵyn sý jetkiziledi. Sonda biz 200 mln tekshe metr sýdy Túrkistanǵa jetkizetin bolamyz», - dep túsindirdi Ó. Shókeev.
