Atalmysh bastama buǵan deiin qala irgesindegi birqatar aýyl-aimaqtarda júzege asqan. Endi qalamyzda jalǵasyn taýyp, shaharymyzdaǵy móltek aýdandardyń tóraǵalary, orynbasarlary, kóshe bileri men kóshe aǵalary jumysqa belsene kirisip ketken.
Bastamanyń nátijeli jumys jasap jatqandyǵy jiyn barysynda belgili boldy. Atap aitsaq, maqtazaýyt mańyndaǵy qaraýsyz qalyp, qoqysqa tolǵan mazarat «Aq maqta» móltek aýdany tóraǵasynyń tyńǵylyqty jumysy nátijesinde tazalanyp, kúl-qoqystan arylǵan. Aita keterligi, «Maqtazaýyt» pen «TGJD» aýmaqtary «Aq maqta» bolyp ózgertilip, jańa ataýǵa ie boldy.
«Túrkistan qalasyn gúl qalaǵa ainaldyraiyq» atty úndeýi aiasynda ótken basqosýǵa oblystyq aqsaqaldar alqasy men qalalyq «Qoǵamdyq kelisim» keńesi, qala ákiminiń orynbasary Ǵ.Rysbekov qatysyp, tyń jobanyń jumysyna erekshe toqtalyp ótti.
Oblystyq aqsaqaldar alqasynyń tóraǵasy J.Áziretbergenovtyń aitýynsha, mektep, bazar, balabaqsha, toihana jáne úi men kóshe boilaryna aǵash egilip, gúlmen kómkerilýi kerek. Árbir úi 5-6 aǵashtan, al mektepter men mekemeler 10-15 aǵashtan egip, ósiretin bolsa, qalanyń ózi de aýasy da tazaryp shyǵa kelerine bek senimdi. Osyǵan bailanysty konkýrstyq negizde báige jariialanyp, nominatsiialar taǵaiyndalmaq niette.
- Elbasymyzdyń «Bolashaqqa baǵdar: rýhani jańǵyrý» jáne «Uly dalanyń jeti qyry» maqalalary aiasynda oblystyq aqsaqaldar alqasy men «Qoǵamdyq kelisim» keńesiniń bastamasymen qalanyń mádenieti, tártibi, tazalyǵyna erekshe den qoiý maqsatynda osy júie qolǵa alynyp otyr. Atalǵan jobanyń eń negizgi túpki maqsaty – halyqpen tikelei jumys jasaý, jastardy tárbieleý, qalanyń kórkeiýine atsalysý jáne rýhani jańǵyrý bolyp sanalady. Bul joba ár turǵynnyń óz aýlasyn ózi qadaǵalaýyna jáne ustazdardyń senbilikke shyǵyp, jumys erejesine kirmeitin ispen shuǵyldanbaýyna sebep bolmaq, - dedi Ǵ.Rysbekov.
Sonymen qatar, oblystyq sottyń usynysymen oblystyq aqsaqaldar alqasy janynan oblystyq biler keńesi quryldy. Olar daýdy sheshýge jáne tiisti mamandardy shaqyrýǵa quqyly. Iaǵni, Tóle, Qazybek, Áiteke bilerdiń jolyn jalǵaityn, sara isti júzege asyratyn alqa bolmaq.
Janerke JARYLQASYN
