Foto: Gov.kz.
Oblys ákiminiń orynbasary Nurbol Turashbekovtiń tóraǵalyǵymen búgin májilis ótip, Túrkistan oblysynda josparlanǵan investitsiialyq jobalardy iske asyrý baǵytynda atqarylǵan jumystar saralandy, dep habarlaidy «Ult aqparat».
Ózekti máseleler men olardy sheshý joldary talqylanǵan jinalysqa Aýyl sharýashylyǵy basqarmasynyń, Energetika jáne turǵyn úi-kommýnaldyq sharýashylyq basqarmasynyń, Baqylaý jónindegi basqarmanyń jáne «Túrkistan ÁKK» AQ-nyń jaýapty mamandary qatysty.
Oblys ákimi Darhan Satybaldynyń tapsyrmasyna sáikes, invest-jobalar josparlanǵan merziminde jumysyn bastaýy úshin úilestirý isine baqylaý kúsheitiledi. Nurbol Turashbekov aýyl sharýashylyq ónimderin tereń óńdeitin kásiporyndar qurylysyna qatysty naqty tapsyrmalar bekitti:
- Qujattardy keshiktirýge nemese týyndaǵan máselelerge nemquraily qaraýǵa jol berilmesin. Mindetterińizdi jaýapkershilikpen atqaryńyzdar, - dedi oblys ákiminiń orynbasary óz sózinde.
Investitsiialyq jobalar boiynsha qozǵalys kartasy ázirlenip, turaqty túrde aptalyq esep túziledi. Sonymen qatar, jaýapty mekemeler men qyzmet ókilderiniń jáne basqa da múddeli tulǵalardyń qatysýymen apta saiyn jumys keńesterin ótkizý kelisildi.
Onda investorlardyń ár máselesi jeke qaralyp, pármendi sheshimder qabyldanady, osylaisha, investordyń usynystary men problemalary ákimdiktiń nazarynan tys qalmaidy.
