Búgin Túrkistan qalasynyń oblys ortalyǵy atanǵanyna 4 jyl tolýyna orai "Túrkistan – Er Túriktiń besigi" atty aqyndar aitysy ótti, dep habarlaidy "Ult aqparat" Túrkistan oblysy ákimdiginiń baspasóz qyzmetine silteme jasap.
Dúbirli dodada aitystyń aqtańgerleri Bekarys Shoibekov, Aibek Qaliev, Muhtar Niiazov, Jansaia Mýsina, Nurzat Qarý, Shuǵaiyp Sezimhan, Nurlan Esenqulov, Meiirbek Sultanhan syndy jalyndy aqyndar baqtaryn synady.
Aitystyń ashylý saltanaty Túrkistan qalalyq Mádeniet úii ónerpazdarynyń "Iassy shahary" taqyrybyndaǵy teatrlandyrylǵan kórinispen bastaldy. Túrkistan qalasy ákimdiginiń qoldaýymen ótken jyr saiysynda sóz alǵan Túrkistan qalasy ákiminiń orynbasary Erlan Kúzembaev barsha aqyndarǵa sáttilik tilep, aitys óneriniń bereri mol rýhani qundylyq ekenin tilge tiek etti.
Alaman aitystyń alǵashqy jubyn shymkenttik Nurlan Esenqulov pen almatylyq arý Nurzat Qarý bastady. Ádemi ázildermen órilgen qyz ben jigit aitysy kórermender kózaiymyna ainaldy. Sondai-aq, aitys óneriniń azýly arlandary túrkistandyq Bekarys Shoibekov pen torǵailyq Aibek Qalievtyń tartysty aitysy da kópshilik kóńilinen shyqty. Altyn dombyranyń úsh dúrkin iegeri qyzylordalyq Muhtar Niiazov pen Aqjaiyqtyń arýy Jansaia Mýsina arasyndaǵy aitys ta ádemi ázildermen kómkerildi.
Al, Nur-Sultannan kelgen Meiirbek Sultanhan men almatylyq Shuǵaiyp Sezimhan arasyndaǵy saiys ta aitary mol aitys boldy.
Bas júldeni almatylyq aqyn Shuǵaiyp Sezimhan ielense, oraldyq arý Jansaia Mýsina birinshi orynǵa laiyq dep tanyldy. Al ekinshi oryndy qyzylordalyq Muhtar Niiazov jeńip alsa, úzdik úshtikti túrkistandyq Bekarys Shoibekov men Arqalyqtyń arqaly aqyny Aibek Qaliev qortyndylady. Odan bólek, Táýshen Ábýova atyndaǵy nominatsiia Nurzat Qarýǵa berilse, Qanybek Sarybaev atyndaǵy nominatsiia Nurlan Esenqulovqa tabystaldy. Sondai-aq, Kópbai Omarov atyndaǵy nominatsiia Meiirbek Sultanhanǵa berildi.
