Foto: basnews.kz
Ádilhan Málik — sýretteri arqyly ózindik stil men dástúrler sabaqtastyǵyn qalyptastyrǵan jan. Sýretshi maqsaty — týǵan jerdiń tasyn túrlendire sýretteý, tarihyn maqtan tutý,-dep habarlaidy «Ult aqparat».
Onyń Otyrarda týǵan Farabiler shoǵyrynan bastap, Otyrar qorǵanysy, Otyrar kitaphanasy, Otyrardyń tynys-tirshiligi syndy taqyryptyq jáne erkin formatta salynǵan kartinalary arynyń taza, janynyń móldirligin, rýhynyń asqaqtyǵyn kórsetedi.
Kieli Otyrar óńirinen shyqqan belgili qylqalam sheberi, «Eren eńbegi úshin» medaliniń iegeri, QR Mádeniet salasynyń úzdigi, QR Kórkem Akademiiasynyń «Uly Eldiń Tarandysy» tósbelgisin alǵan, Halyqaralyq «Turan» syilyǵynyń laýreaty, Halyqaralyq «Turan» sýretshiler konsolidatsiiasynyń múshesi, Otyrar aýdanynyń Qurmetti azamaty Ádilhan Máliktiń esimi Otyrar aýdanyna ǵana emes, búkil qazaq eline belgili sýretshi. Ol Otyrar aýdany, Mádeniet saraiynda “Aq zer” kórkemsýret úiirmesiniń jetekshisi. Bul úiirme Mádeniet ministrligi tarapynan “Úlgili” ataǵyn alǵan. Otyrar aýdanynan qurylǵan «Otyrar» halyq teatrynyń dekorator sýretshisi retinde 36-drama qoiylymdarynyń sýretshisi. Jazǵan kartinalarynyń 20 danasy mysyrdyń Kair qalasy ýniversitetterine jáne Damask qalasyndaǵy Ábý Nasyr ál-Farabige arnalǵan mýzeige tabystalǵan.
Halyqaralyq, Respýblikalyq, oblystyq kórmeler men baiqaý jáne simpoziýmdarǵa qatysyp, únemi úzdik atanyp otyrǵan.
Óner men rýhaniiattyń ordasy sanalatyn kieli Otyrar aýdany óziniń álemdi moiyndatqan dańqty perzentterimen maqtana alady. Qasietti topyraqtan shyqqan uly ǵulama ǵalymdar, belgili kompozitorlar, aqyndar men jazýshylar qanshama.
Mine, biyl osy esimderdiń qataryn tolyqtyrǵan aqyn, sazger ári sýretshi Ádilhan Málik Tabylhanuly asqaraly 60 jasqa tolyp otyr. Búgin aýdanymyzda saf ónerdiń rýhaniiat qazynasy sanalatyn-sýret ónerin, saz jáne qara óleńniń kósh kerýenin qara nardai alǵa birge súiregen jannyń «Ónerim-ómirim,poeziia-pirim»» atty ádebi-sazdy rýhani óner keshi ótti.
Taǵylymdy sharaǵa kelgen óner súier qaýym aldymen aýdandyq mádeniet saraiynyń kire beris foiesindegi sýretshiniń shyǵarmashylyǵyndaǵy týyndylardan quralǵan kórme galereeiamen tanysty. Avtor foiedegi kartinalardy jáne «Otyrar ermitajy» ǵimaratynyń proektisin kórsetip, shyǵý tarihyn túsindirdi.
Munan soń ónerpazdar sýretshini erekshe qurmetpen tórge shyǵaryp, ánnen shashý shashty. Ádilhan Tabylhanulynyń ómiri men óneri qatar órilgen beinebaian kópshilik nazaryna usynyldy.
Atalǵan sharaǵa aýdan ákimi Sáken Sultanhanov pen aýdandyq máslihat tóraǵasy Ýalihan Uzaqov qatysyp, mereitoi iesin quttyqtady.
Aýdan ákimi óz sózinde: «Qazaqstan Mádeniet salasynyń úzdigi, qylqalam sheberi, aqyn Ádilhan Tabylhanuly Málik óz shyǵarmashylyǵyndaǵy sýret óneriniń tamasha týyndylarymen kópshilikti tańdandyryp, sýret óneriniń damýyna súbeli úles qosyp kele jatqan tulǵa. Biz Ádilhan aǵamyzdyń týyndylaryn óskeleń urpaqqa nasihattai otyryp, olardyń sýret ónerine degen qyzyǵýshylyǵyn oiatyp, shyǵarmashylyqqa jaqyn ónerli jastardy el tarihyn, ónerin dáripteýge tiispiz. Sebebi, sýretshi ulttyń rýhani muralaryn qaita jandandyrýda jáne jańǵyrtýda aýqymdy jumystardy atqaryp, ony álemge tanytýda. Osynaý uly óner jolyn jalǵap, óńirimizdiń mádeni-rýhani damýyna ózindik úlesin qosyp kele jatqan Sizdi búgingi mereitoiyńyzben quttyqtai otyryp, denińizge saýlyq, otbasyńyzǵa amandyq, qut-bereke, el igiligi jolyndaǵy shyǵarmashylyǵyńyzǵa tolaǵai tabys tileimin!»-dedi.
Munan soń sóz alǵan aýdandyq máslihat tóraǵasy Ýalihan Uzaqov asyl oi, jaýhar sezimge sýarylǵan jyrlary, ánderi men kenepke salynǵan syrly sýretteri Otyrardyń rýhani álemin baiytqan ústine baiyta túskeni, ónerli jannyń eńbegi men seniminiń jemisi ekenin aityp, shyǵarmashalyq tabystar tiledi.
Kesh barysynda Qazaqstan sýretshileri men dizainerler odaqtarynyń múshesi, halyqaralyq «Amanat» syilyǵynyń iegeri Qarabdalov Kendebai Ábjapparuly, Sháýildir aýyldyq ardagerler keńesiniń tóraǵasy Myrzahmet Temirbekov, aýdandyq qoǵamdyq keńestiń tóraǵasy Jalǵasbai Kólbai, Otyrar aýdanynyń burynǵy ákimi Beibit Syzdyqovtar on saýsaǵynan óner tamǵan azamattyń adamgershiligi men azamatyǵy jaiynda áńgimelerin aityp, izgi lebizderin jetkizdi.
Odan ári ádebi-sazdy rýhani óner keshinde Ádilhan Máliktiń óleńderi oqylyp, júrek túkpirinen shyqqan syrly ánderi shyrqaldy. Tula boiy ónerge tunǵan, júregi óner dep soǵatyn jannyń rýhani keshine kelgen kópshilik erekshe kóńil-kúige bólenip, rýhani lázzat alyp qaitty.
Mártebeli oqyrman, endi shaǵyn maqalamyzdyń taqyrybyna kóshsek. Golfstrim men sýretshiniń arasynda qandai bailanys bar deýińiz ábden múmkin. Durys oilaisyz, eshqandai da jaqyndyq joq. Al, sýretshi emes, adam Ádilhanmen... qatysyn anyqtaý úshin Golekeńniń sipattamasymen tanysyp alaiyq.
Golfstrim – Atlant muhitynyń soltústik bóligimen eni 70-90 shaqyrym bolatyn, saǵatyna 6 shaqyrym jyldamdyqpen aǵatyn jyp-jyly aǵys. Býyrqanyp, burqanǵan, taýdai tolqyndary kóbigin shasha jartasqa urǵan, doly da kókbet Atlant muhitynda bárine jaily Golfstrim atty jyp-jyly aǵys bar.
Bilsem, úirensem degen shákirtterine jyly jymiyp qoiyp, jalyqpai óner úiretip jatqan sýretshi Ádilhandy kórsem; «ata, anaý ne, mynaý ne?» dep jan-jaǵynan qaýmalaǵan nemerelerine meiirlene qarap, erinbei jaýap beretin ata Ádilhandy kórsem; qolyna qylqalamyn qysa ustap, ainalasyna jyly shýaq shashyp turǵan sýretshi qurdasymdy kórsem oiyma eriksiz alyp muhittaǵy Golfstrim oralady.
