Foto: aimak.com.kz
Elimizde karantin oryn alǵannan beri dezinfektsiialaý qyzmetine suranys artqany belgili. Ásirese qaýipsizdik sharalaryn júrgizýde atalǵan qyzmet túrkistandyq turǵyndardyń suranysyna ie bolyp keledi. Bekarys Ibragimov – osy kásipten násip tapqan azamat. Turǵyn úilerge, jumys oryndaryna shybyn-shirkei, jándikter men egeýquiryqtarǵa qarsy jumystardy júrgizý úshin mamandar arnaiy daiyndyqtan ótedi. Bekaryspen búginde mańyzdy salaǵa ainalǵan zalalsyzdandyrý jumystary týraly az-kem suhbatymyzdy bólisip otyrmyz.
– Ózińizge belgili, dezinfektsiia júrgizý jumystaryn kópshilik tolyq túsine bermeidi. Osy kásipti meńgergen adam retinde oqyrmanǵa óz jumysyńyzdy túsindirip ketseńiz…
– Negizi kóp turǵyndarǵa zalalsyzdandyrý jumystaryn jasamas buryn aldymen túsindirme jumystaryn jasaimyn. Uǵynyqty tilmen aitar bolsam, dezinsektsiia ol – jándikterdi joiýǵa jasalsa, dezinfektsiia – infektsiialyq jáne parazittik aýrýlardyń qozdyrǵyshtaryn joiý baǵytynda jasalady. Al deratizatsiia – kemirgishterden tazartý is-sharalary desek bolady. Aitqandai bul is-sharalardyń árqaisyna ártúrli dáriler qoldanylady. Mysaly, qazirgi tańda Germaniialyq himikattardy Astana ne Almaty qalalarynan aldyryp jumys jasap jatyrmyz.
– Bul salaǵa qyzyǵýshylyq qai kezde bastaldy?
– Men qalamyzdaǵy ozyq oqý ordasy HQTÝ-da bilim alyp júrgen 2-kýrsymda zalalsyzdandyrý jumystaryna qyzyǵa bastadym. Negizgi mamandyǵym – filolog. Bylai qarasańyz, ekeýi múldem bólek dúnie. Filolog bolýymnyń artyqshylyǵy — klienttermen jaqsy qarym-qatynas ornatýǵa, iskerlik bailanysty nyǵaitýǵa kómektesedi. Adam óz qalaýyn oryndaǵysy kelse, oǵan eshteńe qarsy bolmaidy dep oilaimyn. Bir qyzyǵy, bul jumysty men Shymkentke baryp úirendim. Shymkenttegi «Comfort.center» JShS-nda jumys jasap júrip, aldymen barlyq erejelermen tanysyp, arnaiy osy kásipke bailanysty sertifikat aldym. Sosyn osy isti Túrkistan qalasynda da jeke kásip retinde jalǵastyrýǵa kúsh saldym. Osydan soń elde karantin júiesi kúsheiip, bul mamandardyń kómegine júginetin turǵyndar kóbeie tústi. Qazirge deiin, shúkir, óz qaýipsizdigine beijai qaramaityn turǵyndardan tapsyrystar tolastaǵan emes.
– Sizdiń qyzmetińizdi tutynýshylardyń qatary kóbeiip kele me? Qandai qyzmetter bar? Klientterdiń kóńili tola ma?
– Negizinen qaladaǵy turǵyn úilerge, ákimshilik jáne kommertsiialyq ǵimarattarda kezdesetin adam ómirine ziiandy virýstardy, jándikterdi, kemirgishterdi birjolata joiatyn zalalsyzdandyrý jumystaryn jasaimyn. Kúndelikti úi jaǵdaiynda sanitarlyq normalardy saqtamaýdyń saldarynan túrli jándikter úiimizde qaptap ketýi, ǵimarattarda, jertólelerde kemirgishter kóptep kezdesýi, epidemiologiialyq virýstardyń paida bolyp taralýy zalalsyzdandyrý jumystarynyń qanshalyqty qajet ekenin kórsetedi. Ásirese, Túrkistan qalasyndaǵy úilerde sary qumyrsqa, qandala, taraqan, búrge, kene sekildi halyqtyń máselesine ainalǵan jándikter kóp kezdesedi. Bizdiń qyzmettiń artyqshylyǵy — tek eýropalyq sapaly preparattardy qoldaný arqyly nátijeli qyzmet kórsetý. Bul rette arnaiy jeńildikter de qarastyrylǵan. Sonymen qatar, zalalsyzdandyrý jumystary kezinde kepildik beremiz. Mysaly, bir ret dezinfektsiia jumysyn jasaǵan soń, bir aptadan soń dál sol baǵada taǵy bir ret zalalsyzdandyrý jumystaryn jasaimyz. Eger jándikterge qatysty alty ai ishinde taǵy da bir shaǵym bolsa, onda kelesi jumys tegin jasalady. Osyndai jeńildikter qala halqynyń kóńilinen shyǵyp jatyr. Sonymen qatar, 1,2,3 top múgedekteri men asyraýshysynan aiyrylǵan jandarǵa, kópbalaly otbasylarǵa qoljetimdi baǵada dezinfektsiia jumystaryn jasaimyz. Klientterdiń de kóńili tolyp, jaqsy baǵa berýde.
– Jumys barysynda oryn alǵan qyzyqtardy aita ketseńiz…
– Kópshilikpen jumys jasaýdyń ózi qyzyq. Birde kezekti tapsyrysqa barǵanymda barǵan úiim meni «quda kútkendei» kútip aldy. Sodan bir jarym saǵattai káýap pen túrli taǵamdar qoiylǵan mol dastarqanǵa jaiǵasyp, qarq bolǵanym bar. Jańaǵy úidiń adamdary qandala men sary qumyrsqa qaptap ketkenine qatty ýaiymdaǵan bolsa kerek, meni kútip, zor qurmetpen qarsy aldy. Sol kisilermen áli kúnge deiin aǵaiyn-týystai aralasyp turamyz. Jaqynda ǵana sol adamdardan taǵy bir tapsyrys tústi. Bylaiynsha, kez kelgen tapsyrys berýshimen jaqsy qarym-qatynas jasaýdy maqsat etemin. Keide istegen sapaly jumysqa riza bolyp, artyǵymen aqsha tólegen azamattar da kezdesip jatady.
– Búgingi tańda osyndai deńgeige jetý jolynda qandai jumystar atqardyńyz? Ózińizden keiingi osy salaǵa ne basqa kásipke qyzyǵýshy jastarǵa aitar keńesińizben bólisseńiz.
– Kez kelgen jumysta eń birinshi ideia men jańashyldyq mańyzdy dep aitar edim. Sebebi ol bolmasa jumystyń nátijesi kórinbei qalady. Basta osy isti qolǵa alǵanda Túrkistandaǵy tutynýshynyń kóńilinen shyǵatyn erekshe dizaindaǵy jazýlarmen jarnama jasaýdy qolǵa aldym. Jumysty alǵa jyljytý úshin Feisbýk, Instagram, Tiktok áleýmettik jelilerindegi jarnamalar klient tartýǵa kóp áser etti. Osydan eki-úsh jyl buryn Túrkistan jáne Kentaý qalalaryndaǵy aialdamalarǵa, baǵanalarǵa vizitka belgilerin jabystyryp shyqtyq. Osy arqyly turaqty klientter jinaldy. Búginde Túrkistan men Kentaýdan bólek Saýran aýdanyna qarasty birneshe aýyldardan da tapsyrys qabyldap jatyrmyn. Jeke brend qalyptastyrý úshin tutynýshylarǵa jarnamalyq sýretterimiz basylǵan bokaldardy, magnitkalardy syilyqqa beremiz. Jas talaptarǵa aitarym, qyzmettiń basty nysany – sapasy, jarnamasy jáne tiimdi baǵa. Jańa zamanǵa sai jarnama bolsa, kez kelgen isti dóńgeletý qiyndyq týdyrmaidy dep esepteimin.
– Osy kezge deiin jetken jetistigim dep neni atar edińiz?
– Bul kásip ashqannan beri meniń alǵashqy jetistigim – jaqsy adamdarmen jolyǵýym boldy. Jumysyńdy adal atqarsań, eńbektiń berekesi artatynyna kózim jetti. Otbasym men aǵaiyn-týysyma kómektesip, óz qajettilikterimdi de osy jumyspen aqtap kelemin desem bolady. Ákemniń únemi aitatyn sózi maǵan kúsh beredi. «Elge qyzmet etseń, eldiń alǵysyn alsań, senimen maqtanamyn!» degeni kóńilge demeý, júrekke jylý.
– Suhbatyńyzǵa kóp raqmet!
Dáýren TILEÝHAN, aimak.com.kz
