Foto: Gov.kz.
Túrkistan oblysynyń ákimi Darhan Satybaldy Ordabasy aýdanyna issaparynda Qajymuqan aýyl okrýgi, Temirlan aýylyndaǵy etnoaýyldy aralap, abattandyrý jumystaryn kórdi, dep habarlaidy «Ult aqparat».
Aýdan aqsaqaldarymen júzdesip, el birligin saqtaý, aimaqty damytý jóninde pikir almasty. Sonymen birge jergilikti kásiporyndar óndirgen ónimder kórmesin tamashalap, kásipkerlermen kezdesti. Aýdan ákimi men jaýapty basqarma basshylaryna jobalarǵa qoldaý kórsetýdi tapsyrdy.
— Ordabasy aýdanynyń áleýeti óte joǵary. Óndiristi, aýyl sharýashylyǵyn, týrizmdi damytýǵa múmkindik mol. Investitsiia tartý jumystaryn kúsheitý kerek. Bul rette eldiń birligi, aqsaqaldarymyzdyń ónegesi qajet. Óńirdi damytý jumystary jalǵasady,— dedi Darhan Satybaldy.
Etnoaýylda qazaqtyń salt-dástúri men bolmysynan syr shertetin músinder, kiiz úiler ornatylǵan. Bul demalys ornynyń qurylysy biylǵy tamyz aiynda bastalyp, qazan aiynda aiaqtalǵan. Bas merdiger — «M-Build-01» JShS. Jalpy aýmaǵy 0,41 ga.
Óńir basshysyna Qazaqstannyń halyq ártisi, kompozitor, qazaq valsiniń koroli Shámshi Qaldaiaqovtyń qurmetine ashylǵan «Shámshi» alleiasy tanystyryldy. Taiaýda atqarylǵan abattandyrý jumysy týraly baiandaldy. Biyl shilde aiynda bastalyp, qazan aiynda aiaqtalǵan nysannyń qurylys jumystaryn «Armada stroy 2020» JShS júrgizgen. Arys ózeniniń jaǵasynda ornalasqan alleiada sazgerdiń eskertkishi, sahna, oryndyqtar, sýburqaq ornatylyp, kópjyldyq aǵashtar men gúlder otyrǵyzylǵan.
Aita keteiik, biyl Ordabasy aýdanynyń qurylǵanyna 60 jyl tolýyna orai birqatar nysan el igiligine berilgen. Shymkent megapolisi men Túrkistannyń ortasynda ornalǵan aimaq qarqyndy damyp keledi.
