Túrkistan oblysyndaǵy bilim berý mekemelerinde Táýelsizdik kúni merekesi atap ótilip jatyr. Atalǵan is-sharalar Memleket basshysynyń 2021 jylǵy 5 qańtardaǵy «Táýelsizdik bárinen qymbat» maqalasy aiasynda uiymdastyrylýda. Bul týraly óńirlik kommýnikatsiia qyzmetinde ótken brifingte Túrkistan oblysynyń adami áleýetti damytý basqarmasynyń Tárbie jáne qosymsha bilim berý bóliminiń basshysy Jandos Mahanbetov málimdedi.
Onyń aitýynsha, oblystaǵy bilim berý mekemelerinde Táýelsizdik kúni merekesine orai mektepterde – 3932, kolledjderde – 208, balabaqshalarda – 2718 is-shara ótkizý josparlanǵan.
«Azattyǵymyzdy ulyqtaityn aishyqty merekemizde bilim berý mekemelerinde múmkindiginshe memlekettik týdy aishyqty oryndarda kóptep paidalanýǵa mán beriledi. Sonymen qatar, táýelsizdikke jol salǵan qoǵam qairatkerlerin, Jeltoqsan oqiǵasy men onyń qurbandaryn máńgi este qaldyrý maqsatynda mádeni, qoǵamdyq mańyzdy sharalar, kezdesýler uiymdastyrylyp jatyr. Sonymen qatar, oblystaǵy oqýshylardy «Jas Ulan», «Jas Qyran» uiymdaryna qabyldaý rásimderi, «Táýelsizdik biik bolsyn tuǵyryń» atty oqýshylar men stýdentter arasyndaǵy patriottyq ánder baiqaýy jáne «Táýelsizdik bárinen qymbat» taqyrybynda oqýshylar men stýdentter arasyndaǵy debattyq týrnirler ótkizilmek», - dedi Jandos Mahanbetov.
Sondai-aq, áleýmettik jelilerde oqýshylar men stýdentter arasynda «Men óz elimdi maqtan tutamyn!» jáne «Meniń otanym – meniń otbasym» taqyryptarynda shyǵarma jazý, beinerolikter túsirý jáne ony jariialaý jumystary uiymdastyrylýda. Budan bólek, igi bastama retinde bilim berý mekemeleriniń aýlalarynda eńbek ardagerleriniń, ata-analardyń jáne oqýshylar men stýdentterdiń qatysýymen aǵash kóshetterin otyrǵyzý sharalary erikti túrde ótkiziledi.
