Memleket basshysy Qasym-Jomart Toqaevtyń «Ádiletti Qazaqstan: zań men tártip, ekonomikalyq ósim, qoǵamdyq optimizm» atty Qazaqstan halqyna arnaǵan Joldaýy kópten beri júrekte júrgen keleli máselelerdi qozǵady. Sonyń ishinde halyqty áleýmettik jaǵynan qoldaý saiasaty óte ózekti de salmaqty másele. Óitkeni, el turǵyndarynyń ál-aýqatyn kóterý – memleketimizdiń basty maqsattarynyń biri. Osy turǵyda Prezident ózi burynnan aityp kele jatqan máselege qaita oralýy bárimizdiń de kóńilimizden shyqty. Osydan soń Memleket basshysy kelesi jyldy «Jumysshy mamandyqtary jyly» dep jariialady. Árine, bul halyqtyń áleýmettik jaǵdaiyn jaqsartýǵa baǵyttalǵan igi qadamdardyń biri.
«Salalyq mádeniet, aqparat, sport jáne týrizm qyzmetkerleri kásiptik odaǵy» Túrkistan oblystyq filialy ujymy Joldaýda aitylǵan aýqymy zor jáne asa jaýapty mindetterge qoldaý bildirip, aldymyzǵa úlken mindetter qoidyq. Shyn máninde, kásiptik odaqtardyń basty mindetteriniń biri – jumysshy qaýymnyń múddeleri men eńbekterin qorǵaý. Biz udaiy nazarǵa alyp kelgenimizdei, aldaǵy ýaqytta da jumysshy mamandyqtaryn dáripteý arqyly qoǵamda eńbekqor jáne naǵyz maman bolý ideiasyn nasihattai beremiz.
Adal ári tabandy eńbegimen tabysqa jetken adamdar qashanda qurmetti, syily bolýy kerek. Sondyqtan Prezident bastamasy jumysshy mamandyqtarynyń bedelin kóterip, elge qajetti kadrlardy kóbeitýdi usynyp otyr. Bul bizge de zor jaýapkershilik júkteidi. Óitkeni, kásipodaq áý bastan jumysshy mamandardyń qorǵaýshysy, janashyry. Biz aldaǵy ýaqyttarda árbir eńbek ujymyna baryp, Joldaýdy jan-jaqty nasihattaýdy qolǵa almaqpyz. Eńbekqorlyq, kásibilik búgingi kúnniń eń qajetti qasietteri. Sóz joq, óz kásibin jetik meńgergen mamandar ult sapasyn arttyrady. Al, ult sapasynyń jaqsarýy dál qazirgi kezeńde eń ózekti másele ekeni belgili.
Jumysshy degenimiz – qarapaiym eńbek adamy. Degenmen, bul salada ailyq eńbekaqy tómen. Qarapaiym jumysshy kez kelgen salanyń aýyr júgin kóterip kete alatyn mamandyq. Al, kóptegen ata-ana balalarynyń aýyr jumys istegenin qalamaidy. Sondyqtan da olar diplom alsyn dep balalaryn joǵary oqý oryndarynda oqytýǵa áýes. Qalai bolǵanda da institýt, ýniversitet bitirgenderdiń barlyǵy derlik bilikti maman, sheber uiymdastyrýshy, kóregen basshy bolyp kete almaidy. Kórip te júrmiz, qolynda diplomy barlardyń birtalaiy basqa jumystarda. Árine, oqyma, bilim alma demeimiz, biraq qoǵamǵa qajet mamandyqtar boiynsha talpynǵan jaqsy.
Memleket basshysynyń Joldaýynda kórsetilgendei, endigi jerde túrli saladaǵy jumysshylarǵa qurmet kórsetiledi. Básekege qabiletti ekonomikaǵa ie ozyq el bolamyz desek, eń aldymen, adal eńbekti baǵalaýymyz kerek. Al, biz osy adal eńbek etip jatqandarmen etene aralasyp, olardyń múddelerin qorǵaýymyz kerek. Joldaýda «injenerlerge, geologtarǵa, ken ornyn igerýshi mamandarǵa, aýyl sharýashylyǵy, kólik jáne sý salasynyń qyzmetkerlerine, ǵalymdar men ónertapqyshtarǵa beriletin qurmetti ataqtar memlekettik marapattar sanatyna qosylady» delingen. Iá, eńbektiń memlekettik deńgeide baǵalanýy barlyq kásip iesine shabyt beredi, olardyń abyroi-bedelin kóteredi.
Joldaýdaǵy jumysshy mamandyqtaryn qoldaý týraly aitylǵan jáitter bizdiń de oiymyzdan shyǵyp otyr jáne ony qoldaimyz.
Bastarbek PIRIMBETOV,
«Salalyq mádeniet, aqparat, sport jáne týrizm qyzmetkerleri kásiptik odaǵy» Túrkistan oblystyq filialynyń tóraǵasy
