Foto ©️ Tengrinews.kz / Turar Qazanǵapov
Áýejaida qoǵamdyq tártipti buzǵan mas er adamǵa 220 myń teńge aiyppul salyndy, - dep habarlaidy Polisia.kz portaly.
Túrkistan qalasy áýejaiyndaǵy jelilik politsiia bólimshesiniń qyzmetkerleri patrýldeý kezinde qoǵamdyq tártipti buzǵan er adamdy anyqtady. Tekserý barysynda Shymkent qalasynyń 38 jastaǵy turǵyny ekeni belgili boldy. Ol qoǵamdyq orynda masań kúiinde bolyp, ainalasyndaǵylarǵa balaǵat sózder aitqan. Sondai-aq quqyq buzýshy politsiia bólmesine jetkizý kezinde bilik ókilderiniń zańdy talabyna baǵynbaǵan.
Oǵan qatysty birden úsh ákimshilik hattama, iaǵni, alkogoldik ishimdikterdi ishkeni nemese qoǵamdyq oryndarǵa masań kúiinde kelgeni, usaq buzaqylyq jasaǵany, sondai-aq quqyq qorǵaý organy qyzmetkeriniń zańdy ókimine nemese talabyna baǵynbaǵany úshin ákimshilik hattama toltyrylyp, materialdar tiisti sheshim qabyldaý úshin Túrkistan qalasy boiynsha mamandandyrylǵan ákimshilik sotyna joldandy. Aita ketý kerek, bul azamat buryn bir jyl ishinde alkogoldik ishimdikterdi ishkeni úshin ákimshilik jaýapkershilikke tartylǵan bolatyn. Sot sheshimimen er adamǵa 60 AEK (221 520 teńge) mólsherinde aiyppul salyndy.
Eske salaiyq, jyl basynan beri kólik politseileri túrli ákimshilik quqyq buzýshylyqtar jasaǵany úshin 7312 azamatty ákimshilik jaýapkershilikke tartty, onyń ishinde alkogoldik ishimdikter ishkeni jáne qoǵamdyq oryndarǵa masań kúiinde kelgeni úshin - 608, usaq buzaqylyq úshin - 67 jáne taǵy basqa quqyq buzýshylyqtar tirkeldi.
