Foto: Gov.kz.
Túrkistan oblysy, Arys qalasynda óndiris oryndary kóbeiip, investitsiia kólemi artady. Aýyl sharýashylyǵy, logistika salalarynda da mańyzdy jobalar júzege asady. Bul jospardyń bári Arys qalasynyń 2030 jylǵa deiingi ekonomikalyq damý strategiiasyna engizildi, dep habarlaidy Ult.kz.
Atalǵan qujat oblys ákimdiginde ótken arnaiy májiliste tanystyryldy. Túrkistan oblysynyń ákimi Darhan Satybaldy Arys qalasynyń tranzittik, logistikalyq jáne óndiristik áleýetin tolyq paidalaný kerektigin aitty.
– Damý strategiiasyndaǵy árbir jospar men indikatorlar oryndalýy tiis. Turaqty qadaǵalanady. Investitsiia kólemin ulǵaitý mańyzdy. Kelissózder júrgizip, jumys oryndaryn kóbeitetin jobalardy júzege asyryńyzdar. Arystyń múmkindigi joǵary. Jaqsy bastamalar bar. Nátije kútemin, – dedi Darhan Satybaldy.
Arys qalasynyń ákimi Gúljan Qurmanbekovanyń aitýynsha, 9 aidyń qorytyndysymen jalpy óńirlik ónimniń kólemi 38,5 mlrd. teńgeni qurady.
Usynylyp otyrǵan damý josparyna sáikes 2030 jylǵa deiin Arysta ónerkásip óndirisi 12,6 mlrd. teńgeden, 35,8 mlrd. teńge jetip, 3 esege deiin ósedi dep kútilip otyr. Óńdeý ónerkásibi 20,4 mlrd. teńgege jetip, 2,5 esege deiin ósse, qurylys jumystarynyń kólemi 9,5 mlrd. teńgege jetip, 1,5 esege deiin ósedi degen jospar bar. Saýda kólemin 30,2 mlrd. teńgege, iaǵni, 2 esege deiin ósirý kózdelgen. Al aýyl sharýashylyǵy kólemin 74,8 mlrd. teńgege jetkizip, 2,5 esege deiin ósirý mejelengen. Nátijesinde jalpy óńirlik ónim 72,2 mlrd. teńgeden 170,7 mlrd. teńgege jetip 2,4 esege deiin ósedi degen jospar bar.
2030 jylǵa deiin Arysta jalpy quny 386,1 mlrd. teńgege quraityn 166 investitsiialyq jobany iske asyryp, 5 myńǵa jýyq jańa jumys ornyn qurý josparlanýda. Atap aitsaq, aýyl sharýashylyǵynda 59 joba júzege asyrylyp, 1843 jańa jumys orny qurylady. Sý únemdeý tehnologiialaryn endirýde 4 joba iske asyp, 105 jańa jumys orny qurylmaq. Ónerkásip salasynda – 49 joba, quny 135,6 mlrd. teńge (1607 jańa jumys orny), al bilim jáne densaýlyq salasynda 22 joba júzege asyp, 685 jańa jumys orny ashylady dep kútilip otyr.
Qalaǵa 107,4,0 mlrd. teńgege deiin investitsiia tartylyp, jyldyq investitsiia kólemi 4 esege deiin ósedi degen meje qoiylǵan. Aimaqta rezeńke jáne plastmassa buiymdaryn óndiretin kásiporyndar ashylady. Mashina jasaý, tamaq ónimderi, qurylys zattary men basqada ónimder, munai-himiia, kókónis jáne jemis-jidek óńdeý boiynsha jobalar júzege asyrylady.
