El Táýelsizdiginiń 28 jyldyǵy qarsańynda Túrkistan qalasyndaǵy «Otyrar» yqshamaýdanynda turǵyn úiler tabiǵi gazben qamtamasyz etildi. Saltanatty sharaǵa qatysqan Túrkistan oblysy ákiminiń orynbasary Meiirjan Myrzaliev ystyq lebizderin jetkizip, gaz qubyryn iske qosty, dep habarlaidy QazAqparat.
Halyqaralyq mańyzy bar «Beineý-Bozoi» magistraldy gaz qubyrynyń sharapatyn kórýshiler qatarynda túrkistandyqtardyń sany artyp keledi. Aldaǵy kúnderi qalǵan abonentterdi gazdandyrý jumystary jalǵasyn tappaq. Qalany tabiǵi gazben qamtamasyz etý boiynsha aýqymdy jumystar 11 kezeńmen júzege asyrylýda. Oblys ákimi Ómirzaq Shókeevtiń tikelei qadaǵalaýymen biyl 35 eldi mekenge gaz qosyldy. Jyl sońyna deiin taǵy 50-ge jýyq aýylǵa tabiǵi gaz tartylady.
Sonymen qatar, aimaq basshysynyń tapsyrmasyna sáikes jyl sońyna deiin Túrkistan qalasynyń teń jartysy, iaǵni 20 000 abonentke gaz qosý josparlanýda. Osylaisha shahardaǵy turǵyn úiler 56% gazben qamtylady.
2020 jyldyń sońyna deiin Túrkistan qalasy kógildir otynmen 100 paiyz qamtylatyn bolady. Bul jumystar «QazTransGazAimaq» mekemesimen birlese júrgizilýde. Óńirdi júieli túrde gazdandyrý maqsatynda, 500-ge jýyq eldi mekendi gazben qamtýǵa múmkindik beretin qosymsha jalpy smetalyq jobalar ázirlenýde.
