Túrkimenstanda "Biz biarde" ("Biz osyndamyz" nemese qysqasha "Bi-Bi") dep atalatyn áleýmettik jelisi ashyldy. Bul týraly Azattyqtyń Túrkimen qyzmeti jergilikti aqparat agenttikterine silteme jasap habarlady. Jańa áleýmettik jeli 23 jeltoqsan kúni tanystyrylǵan.
"Sýngat eseri" prodiýserlik ortalyǵynyń bas direktory Aziz Beknazarov áleýmettik jeli týraly "Biz ónimimiz qoldanýshylarǵa unaýy úshin kóp jumys istedik jáne úlken qiyndyqqa tap boldyq. "Biz biarde" jelisin minsiz deýge bolmaidy, biraq kóptegen parametrleri boiynsha Túrkimenstandaǵy basqa áleýmettik jelilerden kem soqpaidy" degen.
Onyń sózinshe, qazirge deiin áleýmettik jeli qosymshasyn bes myńnan astam qoldanýshy júktegen, úsh myńnan astamy turaqty qoldanady.
Túrkimenstanda qazir tanymal áleýmettik jeliler, onyń ishinde Facebook, Twitter jáne Instagram buǵattalǵan. Qoldanýshylar olarǵa proksi serverler arqyly kirýge májbúr.
Elde proksi serverdi qoldanýshylar internetke jii kire almai qalady jáne olardy qaýipsizdik qyzmetkerleri "áńgimelesýge" shaqyryp turady.
