Túrkimenstannyń onsyz da álsiz valiýtasy odan ári qunsyzdanyp, "qara bazarda" 1 dollardyń quny 40 manatqa jetti. Valiýta baǵamy qańtar aiynan beri 50 paiyzǵa tómendegen.
Qańtardyń orta tusynda "qara bazarda" 1 dollar 27-28 manat shamasynda turǵan. Túrkimenstan manaty sodan beri álsirep keledi. Munyń bir sebebi retinde Túrkiiada júrgen túrkimen migranttary jiberetin aqsha kóleminiń azaiýyn aitady. Ortalyq Aziia elderiniń shetelde jumys isteitin azamattary ádette tabysynyń bir bóligin elinde qalǵan týystaryna jiberip turady. Sonymen qatar, Túrkimenstan-Iran shekarasynyń ashylýy da bir faktor retinde atalyp júr. Shekara ashylǵan soń balalaryn shetelde oqytatyn túrkimender dollar satyp ala bastaǵan.
Keiingi eki aptada Túrkimenstannyń ulttyq valiýtasy – manattyń qunsyzdanýy kúrt kúsheiip, 3 sáýirde dollarǵa shaqqandaǵy baǵamy 40 manatqa jetti. 20 naýryzda 1 dollar 30-31 manat shamasynda tursa, 2 sáýirge qarai 38,5 manat shamasynda bolǵan.
Eldiń ortalyq banki 2015 jyly valiýtanyń dollarǵa shaqqandaǵy baǵamyn 3,5 manat shamasynda bekitip, sodan beri ózgertken joq.
Qazba bailyqtarynan túsken tabysqa súienetin Túrkimenstan ekonomikasy keiingi jyldary álemdik naryqta tabiǵi gaz baǵasynyń tómendeýi saldarynan quldyrap keledi. Túrkimenstan barlanǵan gazdyń kólemi boiynsha kósh basyndaǵy elderdiń qataryna kiredi.
Manattyń qunsyzdanýy 2020 jyly naýryzda bastalǵan. Túrkimen gazynyń eń iri satyp alýshysy Qytai importty kúrt azaityp, gaz baǵasynyń álem boiynsha tómendeýine ákeldi. Osydan keiin Ashǵabad shetel valiýtasynyń qunyn qatań baqylai bastady. Ortalyq bank elde jumys isteitin sheteldik kompaniialardy qyzmetkerleriniń jalaqysyn manatpen berýge mindettedi.
Ótken aida el prezidenti Gýrbangýly Berdimuhamedov úkimetke "manatta saqtalǵan qarajatty shetel valiýtasyna aýystyrýda normativtik aktilerdiń oryndalýyn qatań baǵalaýdy" tapsyrdy.
Túrkimenstan biligi aiqyn dálelderge qaramastan elde koronavirýs infektsiiasynyń baryn moiyndamai keledi.
