Túrkimenstan álemde interneti eń nashar el retinde tanyldy. Qoldanýshylarǵa bir filmdi júkteý úshin bir kún qajet.
Álem elderindegi keń jolaqty internet jyldamdyǵy jóninde esep ázirlegen Cable.co.uk saitynyń málimetinshe, internet jyldamdyǵy sekýndyna 0,50 megabitti quraityn Túrkimenstan test júrgizilgen 224 eldiń arasynda eń sońǵy oryndy ielengen. Ol jaqta bes gigabaittyq filmdi júkteý úshin 22 saǵat 34 minýt qajet.
Tabiǵi resýrstarǵa bai Túrkimenstan internet jyldamdyǵy boiynsha Iemen, Ońtústik Sýdan, Somali jáne Aýǵanstan siiaqty soǵystan qatty zardap shekken elderden de artta qalǵan.
Internet jyldamdyǵy sekýndyna 5,83 megabitti quraityn Qazaqstan reitingide 173-orynda tur. Alǵashqy bestikte Lihtenshtein, Andorra, Islandiia jáne Gibraltar bar. Lihtenshteinde internettiń ortasha jyldamdyǵy – sekýndyna 211,26 megabait.
Túrkimenstan - álemdegi eń jabyq elderdiń biri. Ashǵabat keiingi kezde eldegi daǵdarystan zardap shekken adamdardyń shynaiy ahýalyn jasyrý úshin baqylaýdy kúsheitken. Bilik el aýmaǵynan tys jerde taralǵan syni aqparattardy da buǵattaýǵa tyrysady.
