Túrkitildes memleketterdiń álemdik tártipte laiyqty ornyn alýǵa tolyqqandy múmkindigi bar. Mundai pikirdi L.Gýmilev atyndaǵy Eýraziia ulttyq ýniversitetiniń dotsenti, PhD doktory Aibolat Dálelhan bildirdi, dep habarlaidy QazAqparat.
«Túrki tildes memleketter ózderiniń tildik, dini, mádeni-rýhani uqsastyqtaryna, tarihi sabaqtastyǵyna jáne geografiialyq jaqyndyǵyna qaramastan osy ýaqytqa deiin atalǵan uqsastyqtar men ortaqtyqtan jetkilikti deńgeide paida kórme almai kele jatyr. KSRO ydyrap, qoskindikti álemdik tártiptiń joiylǵanyna 30 jyl ýaqyt ótse de ortaq múddeli berik saiasi-ekonomikalyq qurylym qurylmady. Kerisinshe túrkitildes memleketterdiń ár qaisysy ár túrli saiasi-ekonomikalyq uiymdarǵa múshe. 2015 jyly NATO-ǵa múshe bolyp tabylatyn Túrkiia reseilik áskeri-joiǵysh ushaqty atyp túsirgen soń qalyptasqan daǵdarysty jaǵdaidy sheshý baǵytynda Qazaqstannyń kóp eńbektenýine týra keldi. Elbasynyń bedeli men belsendi diplomatiialyq áreketiniń arqasynda orys-túrik shielenisi oń sheshilip, eýraziialyq geosaiasi jaǵdai múlde basqa baǵytta damydy», - dedi ol.
Onyń atap ótýinshe, osy jaǵdailardy esepke ala otyryp, Túrki keńesi sammitterinde sońǵy ýaqytta kóterilip júrgen bastamalardy naqty, tolyqqandy júzege asyrýǵa jumys jasaý kerek.
«Túrki keńesiniń qurmetti tóraǵasy Nursultan Ábishulynyń Baký sammitinde jasaǵan usynysy, iaǵni keńesti uiym deńgeiine kóterý bastamasy múshe memleketter tarapynan qoldaý taýyp otyr. Osy jolǵy beiresmi sammitte Túrkiia Prezidenti R.T.Erdoǵan keńesti uiym deńgeiine kóterý ýaqytynyń kelgenin taǵy bir márte basa atap ótti. Keńes uiym deńgeiine kóterilse, uiym aiasynda qabyldanatyn qujattar men kelisimder anaǵurlym salmaqty bolary anyq. 152 mln halqy, 1,5 trln AQSh dollaryn quraityn ekonomikalary bar túrkitildes memleketter ózara ortaq saiasi-ekonomikalyq ustanymdar qalyptastyra bilse qazirgi almaǵaiyp halyqaralyq qatynastarda syrttan tóner qaýip-qaterler men jańa syn-tegeýrinderge birlese tótep bereri sózsiz. Qazirgi áli de bolsa tolyq qalyptasyp úlgermegen álemdik tártipte túrkitildes memleketterdiń óziniń laiyqty ornyn alýyna tolyqqandy quqyǵy, ári múmkindigi bar. Ol úshin kńeske múshe memleketterdiń shynaiy nieti men jaýapty tulǵalardyń naqty áreketteri qajet», - dedi Aibolat Dálelhan.
