Foto: Ult.kz
Almatyda «Túrki áleminiń media keńistigi: jańa dáýirdegi mindetter men múmkindikter» atty VI Halyqaralyq túrkitildes jýrnalister media forýmy óz jumysyn bastady. Eki kúnge sozylatyn sharaǵa Túrkiia, Ázerbaijan, Qazaqstan, Qyrǵyzstan, Ózbekstan, sondai-aq Eýropa elderinen kelgen sarapshylar, redaktorlar, media menedjerler men jýrnalister qatysyp jatyr, dep habarlaidy Ult.kz.
Forýmda ortaq aqparattyq keńistik qalyptastyrý, jańa medianyń qarqyny, tehnologiialyq ózgerister jáne óńirlik yntymaqtastyqty kúsheitý máseleleri keńinen talqylanyp jatyr.
«Túrki elderi birin-biri tolyq tanymaidy»: Náziia Joiamergenqyzy
Alǵashqy sózdi Túrkitildes jýrnalister qorynyń prezidenti Náziia Joiamergenqyzy alyp, forýmnyń basty maqsatyn túsindirdi.
Onyń aitýynsha, keńestik kezeńnen keiingi aqparattyq alshaqtyq túrki elderiniń bir-birin tanýyna kedergi bolyp otyr.
«Tildik, mádeni jaqyndastyq álsirep, ártúrli alfavitterdiń qoldanylýy ózara túsinistikti tejedi. Osy olqylyqtyń ornyn toltyrý úshin ortaq jobalar jasap, jýrnalisterdi biriktirý mańyzdy», – dedi ol.
Qor basshysy tsifrlyq tehnologiialar men jasandy intellekttiń mediaǵa jańa múmkindikter berip otyrǵanyn atap ótti.
Jańa uiym quryldy: Ázerbaijan men Qyrǵyzstan qosylmaq
Spiker sońǵy jetistikterge de toqtaldy. Briýsselde ótken V media forýmnyń qorytyndysy boiynsha Qazaqstan, Belgiia jáne Niderland birigip Dúniejúzilik Túrki media assotsiatsiiasyn qurdy. Náziia Joiamergenqyzy áriptesterdiń qoldaýymen uiym prezidenti bolyp sailanǵan.
«Búgingi forýmda Germaniianyń qosylýy kútilip otyr. Ázerbaijan men Qyrǵyzstan da niet bildirdi», – dedi ol.
Ministrlik: «Ortaq media keńistik – strategiialyq qajettilik»
Qazaqstan Mádeniet jáne aqparat ministrliginiń ókili Qýanysh Igiman forým qatysýshylaryn quttyqtap, aqparattyq integratsiianyń mańyzyn atap ótti.
«Tarihy, mádenieti jaqyn halyqtar úshin ortaq media keńistikti damytý – tek kásibi mindet emes, strategiialyq qajettilik», – dedi ol.
Ol sonymen birge aqparat aǵynynyń kúsheiýi, gibridtik qaýipter men tsifrlyq platformalardyń ústemdigi jańa tásilderdi qajet etetinin aitty.
Foto: Ult.kz
Ministrlik ókili jasandy intellekttiń medianyń jańa sapasyn qalyptastyryp jatqanyn da atap ótti.
Almaty ákimdigi: «Forým jańa serpin beredi»
Almaty qalasy Ishki saiasat basqarmasy basshysynyń orynbasary Sherehan Dastan is-sharanyń mańyzyn atap ótti.
«Media ókilderi úshin tájiribe almasý – jumystyń sapasyn arttyryp, jańa serpin beredi», – dedi ol.
Forým aiasynda medianyń ekonomikalyq turaqtylyǵy da talqylandy. Ózbekstandyq «Halyq sózi» gazetiniń sarapshysy Nurlan Ýsmanov búgingi medianaryqta kiristi ártaraptandyrý mańyzdy ekenin aitty.
«Bir ǵana tabys kózine súiený – táýekel. Media úshin jazylym, donat, jarnama jáne grant – tórt negizgi tirek», – dedi ol.
Ýsmanovtyń aitýynsha, Ózbekstanda onlain jazylym endi damyp keledi. «Halq sýzi» jáne «Narodnoe slovo» gazetteri qaǵaz jazylymnan onlain júiege ótýdi josparlap otyr.
Sarapshy oqyrman qoldaýy mádenietin qalyptastyrý redaktsiia men aýditoriia arasyndaǵy senimdi arttyratynyn atap ótti.
Media – óńirlik beibitshiliktiń quraly: Kavkaz jáne Taiaý Shyǵys mysaly
Forýmda óńirlik qaýipsizdik máselesi de kóterildi. Ázirbaijan Jýrnalister odaǵynyń tóraǵasy Elchin Shyhli men Germaniiadaǵy Túrik mediasy assotsiatsiiasynyń ókili Adnan Óztúrk media beibitshilik ornatýda sheshýshi ról atqaratynyn aitty.
Foto: Ult.kz
Elchin Shyhli 2020 jylǵy Kavkaz qaqtyǵysy kezinde jalǵan aqparattyń qoǵamǵa tigizgen ziianyn eske alyp:
«Media qorqynysh emes, túsinistik pen empatiianyń úni bolýy tiis», – dedi.
Al Adnan Óztúrk media – «júrekter arasyndaǵy kópir» ekenin atap ótti:
«Beibitshilik saiasattan ǵana emes, til, mádeniet jáne aqparattan bastalady», – dedi Elchin Shyhli.
Almatyda ótip jatqan VI Halyqaralyq media forým túrki áleminiń aqparattyq integratsiiasyn jańa deńgeige shyǵaryp, ortaq jobalardy damytýǵa jol ashpaq. Sarapshylardyń aitýynsha, birikken aqparattyq keńistik – túrki halyqtaryn jaqyndatatyn strategiialyq qadam.
