Túrki álemi qolóner sheberleri Túrkistanda bas qosty. Qasietti shaharda uiymdastyrylǵan sharaǵa túrki tildes elderden barmaǵynan bal tamǵan sheberler qatysty, dep habarlaidy "Ult aqparat".
«Túrkistan - túrki áleminiń mádeni astanasy» jyly aiasynda uiymdastyrylǵan sharada Túrkistan qalasynyń ákimi Álipbek Óserbaev quttyqtaý sóz sóilep, kieli shahardyń biyl sharyqtaǵan jyly bolǵanyn aityp ótti. Ákimniń aitýynsha, aǵymdaǵy jyly jetpisten astam jobalar iske assa, onyń qyryqqa jýyǵy halyqaralyq deńgeidegi basqosýlar bolǵan. Sondai-aq, shahar basshysy shyǵarmashylyq ońailyqpen kelmeitin shabyt ekenin jáne bul, ásirese, qolóner salasynda asqan qaisarlyqty talap etetinin de nazardan tys qaldyrmady. Jiynda TÚRKSOI-dyń qazaqstandyq ókili Asqar Turǵanbaev ta sharanyń mańyzdylyǵyna toqtalyp, kórmeniń aldaǵy kezde de uiymdastyrylatynyn tilge tiek etti.
«Qolóner - bul ólmes óner. Atadan balaǵa miras bolyp kele jatqan bekzat ónerimizdi joǵaltyp almaý bizdiń paryzymyz. Bul ónerdi keiingi jastarǵa úiretý qajet. Sondyqtan da bul festivaldiń mańyzy erekshe. Ózge baýyrlas elder qolónershilerimen tájiribe almasýy da búgingi arnaiy ótken kórmeden kórinis tapty. Túrkistan bir jyldyq qala emes, máńgilik rýhani astanamyz bolyp qala bermek», - dedi Asqar Turǵanbaev. Sonymen birge ol qolóner salasyndaǵy bul festival TÚRKSOI aiasynda alǵash qosylǵanyn jáne aldaǵy mádeni astanalarda da óz jalǵasyn tabatyndyǵyn málim etti.
Shara sońynda qonaqtar qolóner mektebiniń sheberhanasynmen tanysyp, etnografiialyq mýzeide bas qosty. Ózara pikir almasty.
