Búgin Halyqaralyq Túrki akademiiasynyń prezidenti Darhan Qydyráli jyl basy – áz-Naýryz merekesi qarsańynda Qazaqstandaǵy birqatar buqaralyq aqparat quraldarynyń basshylarmen jáne ókilderimen kezdesti, dep habarlaidy "Ult aqparat" akademiianyń baspasóz qyzmetine silteme jasap.
Alqaly jiynǵa Halyqaralyq Túrki akademiiasynyń prezidenti Darhan Qydyráli, «Qazaqparat» halyqaralyq aqparat agenttiginiń Basqarma tóraǵasy Asqar Omarov, «Habar agenttigi» AQ Basqarma tóraǵasynyń birinshi orynbasary Rinat Kertaev, «Balapan» telearnasynyń direktory Maqpal Jumabai, «Qazaq radiolary» JShS Bas direktory Ernur Býrahan, «Elorda Aqparat» JShS direktory Erjan Júnisov, «Qazaqstan» RTRK» AQ Aqparattyq-saraptamalyq baǵdarlamalar direktsiiasynyń direktory Jalǵas Sádibekuly, «Túrkistan» gazetiniń bas redaktory Qýat Áýesbai, «Qazaqstan tarihi» portalynyń bas redaktory Altynbek Qumyrzaq, «Ádebiet» portalynyń bas redaktory Nurlan Qabdai, sondai-aq tanymal BAQ ókilderi qatysty.
Akademiia janyndaǵy Túrki mýzeiinde ótken kezdesý barysynda Akademiia basshysy Darhan Qydyráli uiymnyń atqaryp jatqan jumystar týraly aityp, biyl qolǵa alynǵan jospardyń júzege asý barysymen tanystyrdy.
Sonymen qatar, birqatar BAQ basshylary men ókilderine Túrki áleminiń aqparat salasyna qosqan úlesi úshin arnaiy marapattar men alǵys hattar tabystaldy.
Basqosýǵa qatysýshylar baiyrǵy túrkilerdiń Ulystyń Uly kúninde tós soǵý dástúrimen tanysyp, qoldaryna bolat balǵa alyp, shoiyn tósti soǵyp atalǵan rásimdi atqarýǵa qatysty. Osydan keiin qonaqtar Naýryz kójeden dám tatyp, dastarhan basynda erkin pikirlesti.
Jiynǵa qatysýshylarǵa túrki akademiiasy shyǵarǵan «Tiýrkskii mir. Istoriko-kýltýrnyi Atlas» atty biregei basylym tartý etildi.
Aita ketetin másele, Halyqaralyq Túrki akademiiasy 2020 jyly barlyǵy 42 atalym boiynsha ǵylymi eńbekterdi ázirlep jaryqqa shyǵarǵan. Onyń ishinde Abaidyń 170 jyldyǵy aiasynda 9 eńbek jaryqqa shyqsa, ál-Farabidiń 1150 jyldyǵy, sonymen qatar Tonykók eskertkishiniń 1300 jyldyǵyna arnalǵan eńbekter akademiia tarapynan jaryqqa shyqqan. Avtorlar quramy da áralýan. Olardyń arasynda sonaý Niderland jerinen bastap, baýyrlas Túrkiia, Majarstan, Ázerbaijan, Qyrǵyz eli bar, tipti sonaý Mońǵoliiaǵa deiingi keńistiktegi bilikti ǵalymdardyń túrkitaný salasyndaǵy eńbekteri túrki akademiiasynan basylyp shyǵyp jatyr. Jaryqqa shyǵyp jatqan eńbekterdiń tili de ártúrli.
«Baiyrǵy túrki babalarymyzdan ot jaǵyp, tóske balǵa uryp, Jańa kúndi qarsy alatyn dástúr qalǵan eken. Osy saltty Halyqaralyq Túrki akademiiasy qaita jańǵyrtyp, jyl saiyn mártebeli meimandardy arnaiy shaqyryp, tóske balǵa soǵýdy dástúrge ainaldyryp kele jatyr», - delingen Halyqaralyq Túrki akademiiasynyń baspasóz qyzmeti taratqan málimette.
