Mońǵoliianyń Kentai aimaǵy Delgerhaan sumynynda Túrki akademiiasy halyqaralyq uiymy (TWESCO) men Mońǵoliia Ulttyq mýzeiiniń qoldaýymen uiymdastyrǵan «Kentaidan Ulytaýǵa deiin: tarihi jadynyń jańǵyrýy» atty III halyqaralyq ekspeditsiia aiasynda halyqaralyq dala seminary ótti. Bul týraly Túrki akademiiasy halyqaralyq uiymynyń baspasóz qyzmeti habarlady.
Ǵylymi sharaǵa Akademiia basshysy Darhan Qydyráli, Mońǵoliia Ulttyq mýzei direktory D.Súhbaatar bastaǵan kórnekti tarihshy, arheolog jáne túrkitanýshy ǵalymdar men eki eldiń beldi buqaralyq aqparat quraldarynyń ókilderi qatysty.
Halyqaralyq eskpeditsiia músheleri seminar aldyn Shyńǵys hannyń týǵan jeri - Býrhan Haldýn taýyna shyqty.
Ekspeditsiialyq top osy aimaqtaǵy Haiaa Hýdag jáne Gúnbúrd kóne túrki ǵuryptyq keshenderine arheologiialyq qazba jumystaryn júrgizip, jan-jaqty zertteidi dep josparlanǵan.
Mońǵoliia jerine osymen úshinshi ret uiymdastyrylǵan bul ekspeditsiia Qazaqstan memleket basshysy Nursultan Nazarbaevtyń «Bolashaqqa baǵdar: rýhani jańǵyrý» atty maqalasynda kóterilgen qasterli jerler men tarihi sanany jańǵyrtýdy maqsat tutady.
Aita keterligi, ekspeditsiiaǵa qatysýshylar Mońǵoliia men Qazaqstandaǵy kóne túrki tarihy úshin mańyzdy jerlerdi júrip ótedi. Osylaisha Býrhan Haldýn taýynan bastalǵan ekspeditsiia Ulytaýdaǵy Alasha han, Joshy han kesenesine deiin jalǵasatyn bolady.
