Kollaj: Ult.kz
Almaty qalasynyń tabiǵi, mádeni jáne infraqurylymdyq áleýetin tiimdi paidalanyp týrizimin kórkeitýge bolatyny belgili. Sebebi ońtústik astana tabiǵaty men mádenieti úilesken, eski de jańa ǵimarattary menmundalaǵan erekshe qala. Ótken jyldyń ózinde Almatyǵa kelgen sheteldik týrister sany 1,2 mln adamdy qurady. Ult.kz tilshisi Almatynyń týristik múmkindikterin saralap kórdi.
Almatynyń kóne kósheleri, eski ǵimarattary, mýzeileri, qazaqtyń salt-dástúrin kórsetetin etnoaýyldar, qolóner sheberhanalary, teatr men kinoteatrlary qalanyń mádeni ómirinen habar berse, júgirý marafondary, ulttyq taǵamdar festivali, halyqaralyq deńgeidegi mádeni-rýhani is-sharalar qalanyń týristik múmkindigin asha túsedi.
Taý men tabiǵat úilesken meken
Qala aýmaǵynda Shymbulaq, Oi-Qaragai, Medeý, Býtakovka, Kókjailaý, Ile-Alataýy siiaqty tumsa tabiǵaty ekosaiahat uiymdastyrýǵa taptyrmas jer. Ǵajaiyp taýlary jaiaý serýen (treking), taýǵa shyǵý (alpinizm), taý velosipedi, shańǵy, snoýbord siiaqty belsendi saiahattyń túr-túrin uiymdastyrýǵa suranyp tur.
Aita keteiik, Almaty álemdik týristik baǵyt retinde The New York Times basylymynyń «Barýǵa laiyq 52 oryn» tizimine endi, Wanderlust jýrnalynyń TOP-24 týristik baǵyt qataryna kirdi, al Shymbulaq kýrorty men Oi-Qaragai TMD-da úzdik dep tanylyp, týrizmdegi innovatsiialary úshin marapatqa ie boldy. Bul Almatynyń týristik áleýetin kórsetse kerek.
Al Almatynyń shetine shyqsań Assy, Túrgen, Kólsai, Qaiyńdy sekildi kórki kóz toidyratyn jerler jetip artylady. Bul Almaty qalasynyń kelýshilerin ózine baýrai túsedi.
Resmi derekke súiensek, biyl taýly aimaqta 1000 shaqyrymnan astam marshrýt tsifrlandyryldy, 750 shaqyrymnan astam jol kórkeitildi, 13 kemping aimaǵy quryldy.
Almatynyń gastronomiialyq kelbeti
Budan bólek mádeni astanamyzda dámhana, meiramhanalardiń túr-túri bar ekeni jasyryn emes. Ulttyq jáne túrli halyqtardyń ashanasynan dám tatyp, qýyrdaq, et, baýyrsaq, qymyz siiaqty aspazdyq mádenietti baiqap kórýge bolady. Sonymen qatar kóshe taǵamdarynyń da (street food) alýan túri kezdesedi. Taǵam týrizmi — tek dám tatyp kórý emes, ol — mádenietti seziný. Qazaqstan, sonyń ishinde Almaty, osy baǵytty damyta otyryp týristerdi qyzyqtyra alady.
Ulttyq statistika biýrosynyń málimetteri boiynsha 2024 jyly elde 16 674 qoǵamdyq tamaqtaný orny bolsa, onyń eń kóbi, iaǵni 2 427-si Almatyda ornalasqan eken.
Munyń barlyǵy Almatynyń týristik múmkindigin keńeitip, janjaqty damýyna yqpal etedi.
Ult.kz tilshisine suhbat bergen IUTH Ýniversiteti, “Týrizm” mektebiniń aǵa oqytýshysy Nurjan Ábdirazaqov Almaty qalasyndaǵy infraqurylymdardy damytý, kólik-kommýnikatsiia qyzmetterin jaqsartý, sosyn immidjdi arttyrý úshin jarnama, nasihat jumystaryn damyta berý kerek dep esepteidi.
«Odan bólek qonaqúilerdegi qyzmet kórsetýdi jaqsarta bergen jón. Bizde qazir jaman emes, jaqsy. Ásirese meiramhana, qoǵamdyq tamaqtandyrý salasy jaqsy damyp kele jatyr. Birimen biri jarysyp, básekelestik paida bolǵan. «Baýyrdaq» degen siiaqty túrli ulttyq fast-fýdtarymyz da shyǵyp jatyr. Ulttyq kaloritimizdi kórsetetin «Sandyq», «Tary» degen siiaqty taǵy da basqa ulttyq meiramhanalarymyz shyǵyp jatyr jáne bul quptarlyq is. Osyndai jumystar jasala bergeni durys bolady», ‒ dedi sarapshy.
Almatyǵa qyzyǵýshylyq artty: týrister sany 18%-ǵa kóbeidi
Aziia men Eýropanyń toǵysqan jerinde ornalasqan elimizdiń kórikti shahary geografiialyq ornalasýynyń ózi Almatynyń týrizmge halyqaralyq hab bolýdyń alǵysharty ispettes. Osy maqsatqa baǵyttalǵan Visit Almaty, Kazakh Tourism siiaqty baǵdarlamalar júzege asyp jatyr.
Aita keteiik, biyl Almaty CNN nusqasy boiynsha úzdik týristik baǵyttar tizimine kirip, Booking.com platformasy boiynsha jyldyń eń tanymal qalalarynyń biri atanǵan.
Sonymen qatar buǵan deiin Almaty ákimdigi 2025 jyldyń birinshi toqsanynda shaharǵa kelgen týrister sany 18%-ǵa artqanyn habarlaǵan.
«Bul kezeńde qalaǵa 497 myńǵa jýyq adam kelgen, bul ótken jylmen salystyrǵanda 4,9%-ǵa kóp. Ásirese, sheteldik týrister sanynyń kóbeiýi qýantady: olardyń sany 18%-ǵa artyp, 145 058 adamǵa jetken», - delingen habarlamada.
Týrister leginiń artýy Úndistan (+73,4%), Qytai (+39,3%), Túrkiia (+24%), Birikken Arab Ámirlikteri (+47,8%) jáne Malaiziia (ósim - 5,7 ese) syndy elderden baiqaldy.
Jalpy sońǵy úsh jylda Almatyda týrizm qarqyndy damyp, 91,8% ósim kórsetti. Sheteldik týrister sany 4,2 ese, al ishki týrister sany 56,3%-ǵa artty. Saladan túsken salyq túsimi úsh esege kóbeidi.
2022 jyldan beri qalada 5972 nómirlik qory bar 43 qonaqúidiń qurylysy júrip jatyr, 26 týristik joba júzege asýda, onyń ishinde 7 joba 2025 jyly aiaqtalady.
Qala 2025 jyly 2,5 million týrist tartýdy kózdep otyr. Qonaqtardyń qanaǵattaný indeksi 67,5%, bul qyzmet kórsetý sapasynyń artqanyn kórsetedi.
