Túrkiiada túsirilgen Qoja Ahmet Iasaýi týraly telehikaia jaqyn aralyqta Qazaqstanda kórsetiledi. QR Aqparat jáne qoǵamdyq damý ministri Aida Balaevanyń Túrkiiaǵa jumys saparynyń nátijesinde osyndai ýaǵdalastyqqa qol jetti, dep habarlaidy "Ult aqparat".
Aita keterligi, Qoja Ahmet Iasaýi ómiri týraly teleserial premerasy Qazaqstan men Túrkiiada bir mezgilde ótedi dep josparlanǵan. Túrkiia tarapy túsirgen bul telehikaia «Mavera» dep atalady. Mavera – (arab tilinde «kórinetin álemniń kórinbeitin arǵy jaǵy» degen maǵynany bildiredi) kóne Osmanly tilinde qoldanylǵan sóz. Qazaqsha «tylsym álem», «qarsy jaq», «basqa dúnie» dep aýdarýǵa bolady. Rejisser Iúdjel Húdaverdiniń bul filmi tartymdy ári qyzyqty oqiǵalarǵa toly.
Iasaýi týraly telehikaiany túrikter jańa formatta túsirgen. Onda Qoja Ahmet ómiriniń kópshilik bile bermeitin qyrlary, jalpaq jurtqa beimálim kezeńi kóbirek sýretteledi. Sondyqtan da bul telehikaia Qazaqstan kórermenderi úshin de qyzyqty bolary haq. Telehikaiada Iasaýidiń Arystanbaptan alǵan qurma dáneginiń qurma aǵashyna ainalý oqiǵasy, dárýishter hikaiasy, tarihtaǵy alǵashqy Alyp-erender oqiǵasy tartysty beriledi.
Toqtala ketetin jait, ministr Aida Balaeva sapar aiasynda túrkiialyq TRT teleradiokompaniiasynyń basqarma tóraǵasy Ibrahim Erenmen kezdesken bolatyn. Osy kezdesýde Qazaqstan men Túrkiianyń televiziia salasyndaǵy yntymaqtastyqty tereńdetý, birlesken jobalardy júzege asyrý sóz boldy. Atap aitqanda, taraptar túrki jurtyna ortaq tarihi tulǵa – Qorqyt ata týraly birlesken serial túsirýge ýaǵdalasty. Budan bólek, Qazaqstan men Túrkiia teleradiokompaniialary balalarǵa arnalǵan animatsiialyq jáne tanymdyq filmderdi jasaý týraly jospardy da talqylady.
