Túrikmenstan prezidenti Gýrbangýly Berdymýhamedov Kaspii mańy elderiniń ǵalymdary jumys isteitin "Kaspiidiń innovatsiialyq qalasy" ortalyǵyn salýdy usyndy. Ol bul jaiynda Túrikmenstandaǵy birinshi Kaspii ekonomikalyq forýmynda málimdedi.
Túrikmenstan basshysy BAQ-ta qazasy týraly habar taraǵaly beri alǵash ret iri qoǵamdyq sharaǵa qatysty. Ol forýmda Kaspii óńiriniń logistikalyq ortalyǵyn qurýdy usynyp, óńir elderiniń zamanaýi porttyq infraqurylym salýy qajettigin málimdedi, dep jazady Sputnik agenttigi RIA Novosti-ǵa silteme jasap.
"Kaspii óńiriniń logistikalyq ortalyǵyn qurý týraly ideiaǵa qaita oralǵym keledi. Bul qurylym Aziia men Eýropany bailanystyratyn jańa tranzittik-kóliktik dálizderdi tiimdi paidalanýdaǵy bizdiń ortaq qyzmetimizdi úilestiretin bolady", - dedi ol.
Berdymýhamedov óńirdiń ǵalymdary birlesip innovatsiialyq yntymaqtastyq modelderin oilap tabatyn "Kaspii innovatsiialyq qalasy" halyqaralyq innovatsiialyq-tehnologiialyq ortalyǵyn qurýdy usyndy.
Birinshi Kaspii ekonomikalyq forýmy Túrikmenstandaǵy Avaza demalys ornynda ótip jatyr. Qazaqstan, Resei, Ázerbaijan, Iran jáne Túrikmenstan memleket basshylary Kaspiidiń quqyqtyq mártebesi týraly konventsiiaǵa qol qoiǵannan keiin bir jyl ótken soń bes eldiń delegatsiiasy qaita bas qosty.
Qazaqstan delegatsiiasyn premer-ministr Asqar Mamin bastap barǵan.
Medvedev forýmda ne aitty?
Kaspiidegi iri jobalar bes eldiń mamandarynyń qatysýymen ekologiialyq saraptamadan ótýi tiis, dep sanaidy Reseidiń premer-ministri Dmitrii Medvedev.
"Kaspii teńizindegi barlyq iri joba muqiiat ári ádil ekologiialyq saraptamadan ótýi tiis dep bilemin. Endi ony ótkizý jeńildei túsedi", - dedi Resei premeri.
Medvedev eske sala ótkendei, byltyr transshekaralyq mazmunda qorshaǵan ortaǵa áserdi baǵalaý týraly bes jaqty hattamaǵa qol qoiyldy.
Reseilikter Atyraýǵa tikelei ushqysy keledi
Forýmda Astrahan oblysynyń gýbernatory mindetin ýaqytsha oryndaýshy Igor Babýshkin Atyraýǵa tikelei ushý týraly ideiany qoldaýdy surady.
"Biz Qazaqstannyń Aqtaý qalasy men Bakýge tikelei ushý boiynsha jumysty rettegen soń iskerlik bailanys artty. Astrahan – Ashhabad, Astrahan – Tegeran, Astrahan – Atyraý turaqty reisterin ashýdy usynamyn", - dedi ol.
Bes el Kaspii teńizin qalai "bólisti"?
Kaspii mańyndaǵy bes eldiń prezidentteri 2018 jyldyń 12 tamyzynda Aqtaýda Kaspiidiń quqyqtyq mártebesi týraly konventsiiaǵa qol qoidy.
Qazaqstan, Resei, Iran, Túrikmenstan jáne Ázerbaijan memleket basshylarynyń kelisimi boiynsha, Kaspii teńizi betiniń negizgi aýdanyn bes memleket ortaq paidalanady. Al teńizdiń túbi men qoinaýyn halyqaralyq quqyq negizinde kórshiles elder bólip aldy.
