Túrkiiaǵa resmi saparynyń ekinshi kúni QR Premer-Ministriniń orynbasary – Syrtqy ister ministri Muhtar Tileýberdi Ystanbul qalasynda bolyp, túrik isker toptarynyń ókilderimen birqatar kezdesý ótkizdi, dep habarlaidy "Ult aqparat".
QR SIM-nen málim etkendei, «Koc Holding», «Yildirim Holding», «TAV Holding», «Calik Holding», «Kibar Holding», «Atabay» jáne «Goknur Gida» atty 7 jetekshi túrik holdingteriniń basshylarymen ótken kelissózderde azyq-túlik ónerkásibi, mashina jasaý, taý-ken metallýrgiia salasy, infraqurylym jáne aqparattyq-kommýnikatsiialyq tehnologiialar, himiia ónerkásibi jáne farmatsevtika salalaryndaǵy investitsiialyq yntymaqtastyq máseleleri talqylandy.
SIM basshysy Qazaqstan Túrkiiamen saýda-ekonomikalyq jáne investitsiialyq bailanystardy damytýǵa zor mán beretinin málimdedi. «Biz túrik investorlaryna jan-jaqty qoldaý kórsetýge daiynbyz. Árbir joba memleketimizdiń damýy men Qazaqstan-Túrkiia strategiialyq seriktestigin odan ári keńeitý úshin erekshe mańyzǵa ie», - dedi M.Tileýberdi.
Atalǵan holdingterdiń orta merzimdi perspektivada Qazaqstanǵa salýǵa josparlanǵan investitsiialarynyń kólemi 1 mlrd AQSh dollarynan asady.
«Sonymen qatar, M.Tileýberdi biyl Qazaqstanda 10 jańa óndiristi iske qosýdy josparlaǵan túrik kompaniialarymen jumys tańǵy asyn ótkizdi. Túrik kásipkerleri mashina jasaý, meditsinalyq buiymdar, tamaq ónerkásibi, infraqurylym, taý-ken ónerkásibi jáne turǵyn úi-kommýnaldyq sharýashylyq salasyndaǵy jobalardy júzege asyrýdy josparlap otyr.
Túrik kompaniialaryna Qazaqstannyń investitsiialyq múmkindikteri, biznes júrgizýdi odan ári jaqsartý boiynsha memleket qabyldap jatqan sharalar týraly tolyq aqparat, sondai-aq eksporttyq qoldaý, jekeshelendirý jáne memlekettik-jekeshelik áriptestik sheńberindegi neǵurlym perspektivaly salalar týraly aqparat usynyldy. Biznesmender Qazaqstan Úkimetiniń investorlardy qoldaý aiasyndaǵy qyzmetin joǵary baǵalap, kórsetken qolǵabysy úshin alǵystaryn bildirdi», - dedi QR SIM-nen.
Sondai-aq, M.Tileýberdi Túrki keńesi hatshylyǵynyń jańa keńsesine baryp, osy Uiymnyń Bas hatshysy Baǵdad Ámireevpen ústimizdegi jylǵy 31 naýryzda Túrkistan qalasynda ótetin Túrkitildes memleketter yntymaqtastyǵy keńesiniń beiresmi sammitine daiyndyq barysyn talqylady.
Sapar sońynda QR SIM basshysy qazaqtyń uly aqyny jáne oishyly Abaiǵa arnalǵan biýsttiń saltanatty ashylý rásimine qatysty, sondai-aq onyń esimi berilgen mektepke bardy. Saltanatqa Ystanbul qalasynyń meri Ekrem Imamoglý, osy mektep ornalasqan jáne qazaq diasporasy jinaqy mekendeitin Zeitinbýrný aýdanynyń meri Omer Arys qatysty.
