Túrik aqyny Iýnýs Emreniń óleńderi qazaq tiline aýdaryldy, dep habarlaidy QazAqparat.
2021 jyl IýNESKO jáne Túrkiia Respýblikasynyń Prezidenti Rejep Taiip Erdoǵan tarapynan ómirden ozǵanyna 700 jyl tolǵan, túrik tiliniń eń kórnekti tulǵalarynyń biri Iýnýs Emre jáne túrik jyly bolyp jariialandy.
Iýnýs Emre- Anadoly jurtynda Iassaýidyń mektebin jalǵastyrýshy aqyn, óleńderin Iassaýi jolymen túsindirip jazǵan. Óleńderiniń ideiasy adamzatty súiýge, aqiqatqa, sabyrǵa, iaǵni adamzattyq qundylyqtarǵa úndeidi.
Osy aitýly oqiǵaǵa orai Iýnýs Emre túrik mádeniet ortalyǵy men Qazaqstan Jazýshylar odaǵy Nur-Sultan filialy «Iýnýs Emreniń tańdamaly óleńderi» atty kitapty qazaq tiline aýdaryp, kitap etip basyp shyǵardy. Kitap túrik professor Erdoǵan Boz daiyndaǵan mátindi negizge ala otyryp aýdaryldy. Aqynnyń 13-14 ǵasyrlarda jazǵan «Nasihattar kitaby» jáne «Diýan» jinaǵynyń 72 óleńin Erdoǵan Boz qazirgi túrik tiline yńǵailap mátin túrinde daiyndap shyqty.
Atalǵan mátindi jolma- jol Iýnýs Emre túrik mádeniet ortalyǵynyń direktorynyń mindetin atqarýshy Almagúl Isina qazaq tiline aýdardy. Al, 19 qazaq aqyny osy mátindi óleńge ainaldyrdy. Diýan jinaǵy –Iýnýstyń aqyndyǵynyń shyńy dep sanalady. Jaryq kórgen kitapta qazaqsha aýdarma men 13-14 ǵasyrlardaǵy túrikshe túpnusqasy birge usynylǵan.
Jazýshylar Odaǵy Nur Sultan filialy tóraǵasy Dáýletkerei Kápuly Iýnýstyń kitabynyń aýdarmasyna bailanysty oilaryn bólisti.
«Iýnýs Emre jylyna bailanysty Túrkiianyń Iýnýs Emre institýty men Qazaqstan Jazýshylar odaǵy Nur Sultan qalalyq filialy birlesip, Iýnýstyń 72 óleńin qazaq tiline aýdaryp, kitap etip basyp shyǵardy. Bul jobaǵa Qazaqstannyń eń talantty 19 jas aqyn aýdarmashysyn qatystyrdyq. Sebebi jańa aqyndar, jas aqyndar- qazirgi Evropanyń da, Batystyń da, Shyǵystyń da óleń órnegin biletin izdenimpaz, búgingi ádebietke ózindik qoltańbasymen kelgen aqyndar. Iýnýs Emre jyrlarynyń aýdarmasyna erekshe órnek beredi dep oiladyq.
Qazaq aqyndarynyń ishinde Iýnýstyń jyrlaryn erteden aýdaryp júrgen aitýly shaiyrlarymyzdy Nesipbek Aituly, Ulyqbek Esdáýlet, ótkende ǵana Iýnýstyń jyrlaryn jeke kitap qylyp shyǵarǵan Svetqali Nurjandy atap ótýge bolady. Bul kisilerdiń aýdarmalarynyń orny bólek. Degenmen jastardyń jańasha kózqarasyn Iýnýstyń jyrlarynda tanyǵymyz keldi. Iýnýs Emreniń 72 óleńin 13 ǵasyrdaǵy túrik tilinen qazirgi zamanǵy túrik tiline professor Erdoǵan Boz aýdarǵan. Aqyndarǵa jumys protsesinde óleńniń óziniń túp maǵynasynan, qazyǵynan aýytqymaityndai etip aýdarý týraly usynys jasadyq. Bizdiń 19 aqynymyz óleńderdi tamasha etip aýdaryp berdi.
Bul - Qazaqstan Jazýshylar odaǵynyń Nur Sultan qalasy filialy men Iýnýs Emre institýtynyń birlesken jobasy. Jalpy Túrki dúniesindegi túrik shaiyrlardyń jyrlary árbir elge ortaq. Sondyqtan olar bir –birlerine úlken áserin tigizedi, ári halyqtyń shyǵarmashylyǵyna, búgingi jastardyń ádebietke degen jańasha kózqarasyna áser etedi.
1000 dana jaryq kórgen Iýnýstyń tańdamaly óleńderi jinaǵy Qazaqstannyń oblys ortalyǵyndaǵy barlyq kitaphanalar men ýniversitetterge, aqyndar men jazýshylarǵa tartý etiledi.
Kitaptyń tusaýkeseri 11 naýryz kúni saǵat 15.00-te Nur Sultan qalasynda QR Ulttyq akademiialyq kitaphanada ótedi. Sharaǵa aqyn, jazýshylar, ziialy qaýym ókilderi, Túrkiianyń Qazaqstandaǵy Tótenshe jáne Ókiletti Elshisi, diplomatiialyq missiia ókilderi qatysady.
