Foto: Qaraǵandy oblysynyń ákimdigi
Qaraǵandy oblysy Buqar jyraý aýdanynyń Botaqara kentinde gaz ballony jarylysynan zardap shekken úidiń turǵyndary úshin ýaqytsha baspanalar tabyldy. Bul týraly aýdan ákimi áleýmettik jelidegi paraqshasynda jazdy, dep habarlaidy "Ult aqparat".
"12 otbasynyń ishinde bir otbasy týystarymen turýdy tańdap, ýaqytsha baspanadan bas tartty.
Búgin olardyń úi-jailaryn tekserdim. Kúni boiy ákimdik qyzmetkerleri eriktilermen birlesip, jeke zattardy tasymaldaýdy uiymdastyrýǵa kómektesti.
Otbasylarǵa qajetti kómek pen keńes berý boiynsha memlekettik mekemelerdiń basshylary bekitildi" - Buqar Jyraý aýdanynyń ákimi Abylai Sultanǵali Instagram paraqshasynda.
Onyń sózinshe, tótenshe jaǵdaidyń saldaryn joiý jumystary jalǵasyp jatyr, ári oblys ákiminiń baqylaýynda.
