Úkimet «Báiterek» xoldingin biýdjettik qarjylandyrý týraly qaýlyny qabyldady. Atalǵan qujat boiynsha Turǵyn úi qurylys jinaq bankine qosymsha qarjy bólinedi. Oǵan 20 protsenttik alǵashqy jarnasy bar azamattar 5 protsentpen 25 jylǵa páter nesiesin rásimdei alady, dep xabarlaidy QazAqparat.
QR Indýstriia jáne infraqurylymdyq damý ministri Jeńis Qasymbektiń aitýynsha, búginde Turǵyn úi qurylys jinaq bankinde 1,3 million salymshy tirkelgen. Olardyń aqshasy 660,6 milliard teńgege jetti. Sonyń ishinde 44 700 salymshy páter somasynyń 20 protsentin jinap qoidy.
«Jalpy, búginde turǵyn úi qurylys jinaq júiesi baspana alýdyń eń tiimdi instrýmentterdiń biri bolyp otyr. Salymshylarǵa beriletin zaimdar bastapqy jarnasy 20 protsentke deiin bolǵan jaǵdaida 25 jylǵa 5 protsentke beriledi. Mysaly, quny 8,4 million teńge bolatyn páterdiń, ol shamamen 60 sharshy metrdi quraityn eki bólmeli baspananyń ai saiynǵy tólemi 60 myń teńgeni quraityn bolady. Bólingen qarjy bir jyldyń ishinde 3 111 salymshyǵa qoljetimdi zaim alýǵa múmkindik beredi. Bul qarjy 15 jylda 3 ret ainalymda bolady, iaǵni taǵyda 6 salymshyǵa zaim beriletin bolady», - dedi J.Qasymbek Úkimettiń búgingi otyrysynda.
Ministrliktiń málimetine sáikes, «Nurly jer» memlekettik baǵdarlamasy aiasynda Turǵyn úi qurylys jinaq bankiniń salymshylaryn nesieleý úshin 2017-2021 jyldary aralyǵynda 120 milliard teńge qarastyrylǵan. Biyl atalǵan qarjynyń 28 milliard teńgesi igeriledi. Biýdjettik kredit bankke 0,15 protsentpen 20 jylǵa beriledi.
Aita keteiik, «7-20-25» baǵdarlamasy qabyldanǵannan keiin Turǵyn úi qurylys jinaq banki nesie berý sharttaryn qaita qaraitynyn málimdegen bolatyn. Máselen, áskeri azamattar jáne arnaiy organ qyzmetkerlerine arnalǵan «5-5-25»-tiń jobasy usynyldy. Budan bólek, kredittik baspanany satyp alýdy kózdeitin «5-20-15» sharttary qaraldy.
