Qazaqstan Respýblikasynyń Prezidenti Qasym-Jomart Toqaevtyń tóraǵalyǵymen Úkimettiń keńeitilgen otyrysy ótip jatyr.
Jiynda Indýstriia jáne infraqurylymdyq damý ministri Roman Skliar atqarylǵan jumys jaily esep berdi.
Baiandama aiaqtalǵan soń Memleket basshysy ministrge birneshe suraq qoidy.
"Meniń atyma kommýnaldyq qyzmetterdiń baǵasy men sapasyna qatysty, Turǵyn úi qoryn basqarý týraly kóptegen ótinish, shaǵym kelip túsedi. "E-Shańyraq" pilottyq jobasy qalai júzege asyp jatyr?", - dep surady Qasym-Jomart Toqaev.
Roman Skliar turǵyn úi-kommýnaldyq sharýashylyq máselesi boiynsha eskertý men shaǵym kóp túsetinin moiyndady. Ministr onyń bárine taldaý jasalǵanyn, "Turǵyn úi qatynastary týraly" zań jobasyna ózgerister engiziletinin jetkizdi. Skliardiń aitýynsha, qazir atalǵan zań jobasy Senat qaraýynda jatyr. Kóptegen másele dál osy zań jobasymen sheshilmek. Buǵan qosa, ministr "E-Shańyraq" elektrondyq baǵdarlamasy jaqsy nátije kórsetýde deidi. Ár tutynýshy, ár turǵyn úi iesi onlain rejimde óz úiin basqara alady. Joba kelesi jyly iske qosylmaq.
Skliardiń jaýabyn tyńdaǵan prezident tiisti tapsyrma berdi.
"Jalpy, sizder turǵyn úi problemasyn turaqty baqylaýda, árdaiym nazarda ustaýlaryńyz kerek. Sizder baspana máselesi memleketimizdiń eń ózekti áleýmettik problemasy ekenin túsinýlerińiz qajet. Sońǵy kezde bul máseleniń qanshalyqty ýshyqqanyn ózderińiz kórip otyrsyzdar. Ony sheshýdiń naqty usynystaryn jasańyzdar. Turǵyn úi problemasy ministrdiń, jalpy Úkimettiń turaqty baqylaýynda bolýy kerek", - dedi Qasym-Jomart Toqaev.
