Úkimettiń baspasóz ortalyǵynda ótken brifingte QR indýstriia jáne infraqurylymdyq damý birinshi vitse-ministri Qaiyrbek Óskenbaev turǵyn úi qurylysyna bólingen qosymsha qarajattyń qalai bólinetinin aitty, dep habarlaidy "Ult aqparat" primeminister.kz saityna silteme jasap.
Daǵdarysqa qarsy sharalardy júzege asyrý aiasynda jumyspen qamtýdy jáne áleýmettik-ekonomikalyq turaqtylyqty qoldaý úshin Úkimet 5,9 trln teńge bóldi. Olardyń ishinde turǵyn úi qurylysyna 390 mlrd teńge baǵyttaldy.
Q. Óskenbaev atap ótkendei, bul qarajat «Nurly jer» memlekettik baǵdarlamasyn júzege asyrýǵa baǵyttalady. Onyń ishinde 180 mlrd teńgeni Ulttyq bank «Báiterek» holdingi arqyly barlyq óńirlerge bólgen. Turǵyn úi qurylysy bastaldy. Osy jyldyń sońyna deiin aiaqtalady dep kózdelgen.
Ulttyq bank «Báiterek» holdingine kezekte turǵandarǵa nesielik turǵyn úi salýǵa qosymsha 210 mlrd teńge bólýdi josparlap otyr. Atalǵan qarajat «5-10-20» pilottyq jobasyn iske asyrýǵa baǵyttalady.
«Barlyq qarajat qaitarymdy. Ulttyq bank "Báiterek" holdingine jyldyq 4% mólsherlememen beredi, Turǵyn úi qurylys jinaq bankinde kezekte turǵandarǵa qaryz jyldyq 5% mólsherlememen beriledi. Pilottyq joba biyl iske asyrylady», — dedi Q. Óskenbaev.
Sondai-aq brifing barysynda Q. Óskenbaev kommýnaldyq qyzmet shyǵyndaryn óteý týraly aitty.
«Karantin engizilgen eldi mekenderde azamattardy qoldaý maqsatynda kommýnaldyq qyzmetter shyǵyndaryn óteý týraly sheshim qabyldandy. Ol úshin respýblikalyq biýdjette jalpy somasy 49,3 mlrd teńge qarajat qarastyrylǵan», — dedi Q. Óskenbaev.
Osy tólemderdi alý úshin halyqtyń áleýmettik álsiz tobynan 7 sanat anyqtaldy.
Kommýnaldyq qyzmetter boiynsha ótemaqy alýshylar mindetti túrde turǵyn úidiń menshik iesi bolýy tiis. Kommýnaldyq qyzmetter tólemin óteýge quqyǵy bar tulǵalar sanattary:
- 1, 2, 3 top múgedekteri;
- Uly Otan soǵysynyń múgedekteri men qatysýshylary, olarǵa teńestirilgen tulǵalar;
- múmkindigi shekteýli balalardy tárbielep otyrǵan otbasylar;
- kópbalaly otbasylar;
- tómen jáne odan az zeinetaqy alatyn zeinetkerler;
- memlekettik nemese qoǵamdyq mindetterin, áskeri qyzmetin oryndaý barysynda, ǵarysh keńistigine ushýǵa daiyndyq barysynda nemese ushý kezinde, adam ómirin qutqarý jáne quqyq tártibin saqtaý kezinde qaza tapqan tulǵalardyń otbasylary;
- ataýly áleýmettik kómek alatyn azamattar.
Budan keiin QR Indýstriia jáne infraqurylymdyq damý ministrligi jergilikti atqarýshy bilik organdarynan osy sanattarǵa jatatyn adamdardyń tizimin aldy. Bul — 1,6 mln otbasy.
«Barlyq qajetti rásimder men qujattar qabyldandy. Osy aptadan bastap bul qarjy resýrstary jergilikti atqarýshy organdarǵa beriledi jáne osy kommýnaldyq qyzmetterdiń aqysyn tóleý bastalady. Men halyqtan baibalam salmaýdy suraimyn. Sebebi, karantin jariialanǵan barlyq eldi mekenderde naýryz nemese sáýir ailaryna qaramastan, eki ailyq kommýnaldyq qyzmetter tólenedi degen sheshim qabyldandy. Bul ‒ 1-30 sáýir jáne 1-30 mamyr aralyǵy. Alynǵan qarjy resýrstary sizderdiń jeke shottaryńyzǵa aýdarylady jáne siz osy eki aida kommýnaldyq tólemderdi tólei alasyz», — dedi Q. Óskenbaev.
