Sottalýshylar tarapynan túrme basshylyǵyna aryz-shaǵymdar 74 paiyzǵa qysqardy. Bul týraly Májilistegi Úkimet saǵatynda QR Ishki ister ministri Erlan Turǵymbaev aitty, dep habarlaidy QazAqparat.
Sottalǵandardyń quqyǵyn qorǵaý máselesi erekshe baqylaýda. Zańsyz zattardy anyqtaýǵa baǵyttalǵan tekserý tártibi ózgerdi. Endi bundai tekserýler adam quqyqtaryn qorǵaý uiymdarynyń, prokýrorlardyń qatysýymen jáne beinekameraǵa túsirý arqyly júzege asyrylady. Týystarymen qarym-qatynasta bolýy úshin beinebailanystar uiymdastyryldy. Bul tájiribe karantin kezinde óte tiimdi boldy», - dedi ol.
Onyń atap ótýinshe, sottalǵandar tikelei aryz berýi úshin 121 elektrondy terminal ornatyldy. Nátijesinde mekeme basshylyǵyna qatysty joldanatyn aryz-shaǵymdar 74 paiyzǵa qysqardy. Qoǵamdyq uiymdarmen, adam quqyqtary jónindegi ýákilmen tyǵyz qarym-qatynas ornatyldy.
«Osy jyly shilde aiynda Halyqaralyq Forým ótkizildi. Halyqaralyq sarapshylar men elimizdegi diplomatiialyq missiia ókilderi jaqsy baǵa berdi. Jaqynda sottalǵandardyń quqyǵyn qorǵaýǵa bailanysty zańǵa túzetýler engizý josparlanýda. Onda aýyr naýqastarǵa jaza merzimin keiinge qaldyrý; qatty aýrýyna bailanysty bosatý týraly sot sheshimin tez oryndaý; Sottalǵandy basqa mekemege aýystyrǵanda prokýrorlarǵa habarlama jiberý; sottalǵandardy emdeý ortalyqtaryn Densaýlyq saqtaý ministrligine berý jáne basqa ózgerister bar», - dedi Erlan Turǵymbaev.
