Memleket basshysy Qasym-Jomart Toqaev Ishki ister ministri Erlan Turǵymbaevty qabyldady, dep habarlaidy Aqordanyń baspasóz qyzmeti.
Prezidentke eldegi qazirgi kriminogendik ahýal men ishki ister organdary jumysynyń nátijeleri týraly baiandaldy.
Erlan Turǵymbaevtyń aitýynsha, vedomstvo qylmystyń kóptegen túrlerin ashý kórsetkishterin jaqsartqan. Kisi óltirý, tonaý, buzaqylyq, urlyq, sondai-aq, kámelettik jasqa tolmaǵandar jasaǵan quqyq buzýshylyqtar sany azaiǵan. Qoǵamdyq oryndar men kóshedegi qaýipsizdik deńgeii joǵarylaǵan. Alaida, internet jelisin paidalaný arqyly jasalatyn alaiaqtyq qylmystar sany artqan. Buǵan pandemiia kezindegi onlain-qyzmetterdiń ósýi yqpal etti.
Memleket basshysyna vaktsina alǵandyǵy jóninde jalǵan qujattar taratýdyń jolyn kesý boiynsha qabyldanyp jatqan sharalar týraly aityldy. Jyl basynan beri politsiia organdary 50-i jalǵan vaktsinatsiia pasporttaryn jáne 60-y jalǵan PTR-anyqtamalaryn jasaǵany úshin 110 qylmystyq is qozǵaǵan.
Ministr IIM bólimshelerindegi jeke quram qyzmetkerleriniń 96 paiyzy ekpe alǵanyn jetkizdi.
Kezdesý qorytyndysy boiynsha Qasym-Jomart Toqaev ministrlikke basqa memlekettik organdarmen birlesip, karantindik sharalardy qamtamasyz etýge erekshe kóńil bólýdi, sondai-aq, kámeletke tolmaǵandarǵa qarsy qylmystardyń, turmys salasyndaǵy quqyq buzýshylyqtardyń aldyn alý jáne jol qaýipsizdigin qamtamasyz etý jónindegi jumysty jandandyrýdy tapsyrdy.
