Almatyda Qazaqstan, Qyrǵyzstan, Tájikstan jáne Ózbekstan Respýblikasy Ishki ister ministrleriniń ekinshi keńesi ótti. Bul týraly QR Ishki ister ministrliginiń baspasóz qyzmeti habarlady.
Jiyn barysynda ishki ister organdarynyń qylmyskerlerdi izdestirýdegi ózara is-qimylynyń tiimdiligin arttyrý, sondai-aq shekara mańyndaǵy óńirler ishki ister organdarynyń bótenniń múlkin urlaýǵa qarsy kúrestegi yntymaqtastyǵyn jandandyrý máseleleri talqylandy.
«Bizdiń elderimiz aýmaǵynda qylmys jasaǵan qaýipti qylmyskerlerdi izdeý jáne ustaý, aýyr qylmystardy birlesip ashý baǵytynda kóptegen jaqsy nátijeler bar. Birlesken is-sharalar ótkizý óńirdegi jedel jaǵdaiǵa oń áser etedi. Bul jumys baǵyty boiynsha TMD sheńberinde «izdestirý» halyqaralyq operatsiiasyn (jyl saiyn 2 kezeńde) júrgizý kezinde oń tájiribe jinaqtalǵanyn atap ótkim keledi. Sonymen qatar, birinshi ret tórtjaqty formatta bizdiń elderimizdiń aýmaǵynda mal urlyǵy men adam saýdasyna bailanysty qylmystardy aldyn alýǵa, jolyn kesýge, anyqtaýǵa jáne ashýǵa baǵyttalǵan «Mal urlyǵy» (2018 j. jeltoqsan) jáne «Stop-trafik» (2018 j. qarasha) úilestirilgen jedel-aldyn alý operatsiialary ótkizildi. Osy operatsiialar aiasynda halyqaralyq izdeýde júrgen qylmyskerler ustaldy, shekara arqyly zańsyz aidalatyn birneshe ondaǵan bas mal tabyldy, adam saýdasyna bailanysty 100-ge jýyq qylmys anyqtaldy. Shanhai Yntymaqtastyq Uiymy sheńberinde (8 el, onyń ishinde Qazaqstan, Qyrǵyzstan, Tájikstan jáne Ózbekstan kiredi) jaqynda ǵana (2019 jyldyń shildesinde) sintetikalyq esirtkilerdi jetkizý jáne taratý arnalarynyń jolyn kesýge baǵyttalǵan «Paýtina» esirtkige qarsy alǵashqy operatsiia iske asyryldy. Is-shara barysynda ShYU elderiniń aýmaǵynda 1 myńnan astam esirtki qylmysy anyqtaldy, 7 tonnaǵa jýyq túrli esirtki tárkilendi, esirtki tártibin buzǵany úshin 2 myńnan astam adam ustaldy. Memleket (ShYU) basshylarynyń sheshimi boiynsha bul operatsiia aldaǵy ýaqytta turaqty túrde júrgiziletin bolady», - dep atap ótti Erlan Turǵymbaev.
Sonymen qatar, kezdesýde birlesken izdestirý jumysy transulttyq qylmysqa qarsy kúreste bizdiń is júzindegi ózara is-qimylymyzdyń eń nátijeli negizi bolyp tabylatyny atap ótildi. 2019 jyly Ortalyq Aziia elderinen ishki ister organdarynyń suraýlary boiynsha Qazaqstan aýmaǵynda 70-ke jýyq qylmysker, onyń ishinde asa aýyr qylmys jasaǵan qylmyskerler izdestirildi.
«Birlesken izdestirý jumystary aiasynda qylmystyq ister boiynsha naqty tájiribelik quqyqtyq kómek kórsetiledi. Aǵymdaǵy jyly Qazaqstannan Qyrǵyzstanǵa jáne Ózbekstanǵa 4 jedel-tergeý toby bardy. Olardyń barlyǵy áriptesterinen qajetti qoldaý men kómek aldy. Bul úshin ministrlikterdiń basshylaryna rizashylyǵymdy bildirgim keledi. Kóptegen qylmystardyń ashylýy men izdestirilip jatqan qylmyskerlerdi ustaý bizdiń ishki ister organdarynyń basshylary men qyzmetkerleriniń jeke bailanystary saldarynan múmkin bolatynyna senimdimin. Qylmyskerlerdi izdestirý salasynda bizdiń ózara is-qimyldyń tiimdiligin arttyrý úshin bizdiń beiindi bólimshelerimiz arasyndaǵy bailanystardy odan ári nyǵaitý qajet», - dedi qazaqstandyq IIM basshysy.
