Ishki ister ministri Erlan Turǵymbaev jumys saparymen Mańǵystaý oblysyna bardy, dep habarlaidy "Ult aqparat" vedomstvonyń baspasóz qyzmetine silteme jasap.
IIM basshysy sapar barysynda qoǵamdyq baqylaý komissiiasy ókilderimen birge GM 172/6 asa joǵary qaýipsizdik mekemesinde boldy. Bul koloniiada aýyr jáne asa aýyr qylmys jasaǵan 500 sottalýshy jazasyn óteýde.
IIM basshysy sottalǵandarǵa turmystyq, meditsinalyq-sanitarlyq kómek kórsetý jaǵdaiyn tekserdi. Atalǵan mekemede jazasyn óteýshilerdiń jumys istep, eńbekaqy tabýǵa múmkindigi bar.
«Aiyna 20 myńnan 50 000 teńgege deiin tabys tabamyz, aqshamyzdy týysqandarymyzǵa jiberip kómektesemiz. Birqatary elektrmen dánekerleý, kelesi bireýi jihaz, matras jasaidy. Jumys kiimderin de tigemiz. Barlyq jaǵdai jasalǵan, eshqandai shaǵymymyz joq», - deidi sottalǵandardyń biri.
Sottalǵandar ministrmen áńgime barysynda tamaq sapasynyń jaqsarýyna ǵana emes, sálem-saýqatty ótkizý kólemin 14 keliden 20 kelige deiin arttyrǵany jáne telefonmen sóilesý ýaqytynyń 21:00-ge deiin uzartylǵany úshin alǵys aitty.
Budan soń ministr mekemedegi sottalǵandardy jeke suraqtarymen qabyldady. Qabyldaý barysynda olar vedomstvo basshysyna óz ótinishterin aityp, suraq qoidy.
Jumys sapary barysynda ishki ister ministri Aqtaý qalasy politsiia basqarmasynyń front-ofisiniń jáne «bir tereze» qaǵidasymen jumys isteitin Kóshi-qon qyzmeti ortalyǵynyń jumysymen tanysty. Kóshi-qon qyzmeti ortalyǵynda sheteldikterge JSN rásimdeýden bastap, azamattyq alǵanǵa deiin eńbek etý úshin ruqsat berý boiynsha tolyq qyzmet spektri kórsetiledi.
Ortalyqta politsiia tarapynan halyqqa usynylatyn qyzmetterdi alýǵa bolady. Atap aitqanda qarý tirkeý jáne ony saqtaýǵa ruqsat berý, kúzet qyzmeti úshin litsenziialar, gaz qural-jabdyqtaryn ornatýǵa ruqsat berý jáne ákimshilik aiyppul tóleý jáne basqalar.
IIM basshysy qalanyń teńiz jaǵalaýynda qoǵamdyq qaýipsizdikti qamtamasyz etetin «Kaspii» statsionarlyq politsiia beketine bardy. Uzyndyǵy 11 shaqyrym bolatyn qumdy jaǵalaýdy patrýldeý jol talǵamaityn elektrokarlar men kvadrotsiklderdiń kómegimen júzege asyrylady.
Erlan Turǵymbaev politsiia, TJ jáne QAJ departamentteriniń basshylyǵymen jáne jeke quramymen kezdesý ótkizip, 9 aidaǵy jumystyń qorytyndysyn shyǵardy.
Ishki ister organdarynyń birqatar qyzmetkerleri adal qyzmetteri úshin «Ishki ister organdarynyń úzdigi» keýde belgisimen, sondai-aq gramotalarmen jáne alǵys hattarmen marapattaldy.
