© Sputnik / Vladislav Vodnev
Ishki ister ministri Erlan Turǵymbaev Qaraǵandy oblysy Abai shahtasynda bolǵan jarylysqa qatysty túsinikteme berdi, dep habarlaidy Sputnik Qazaqstan tilshisi.
Buǵan deiin tótenshe jaǵdailar ministri Iýrii Ilin Abai shahtasyndaǵy jarylys úshin qylmystyq jaýapqa tartylatyn bir top kúdikti bar ekenin málimdegen edi. Alaida ishki ister ministri muny joqqa shyǵaryp otyr.
"Qazir shahtany úiindiden tazartý jumysy júrip jatyr. Aldyn ala málimet boiynsha onda metan jarylǵan. Jarylys pen adam ólimi sebepteri anyqtalyp jatyr. Saraptama qorytyndysy boiynsha zańdy sheshim qabyldanady. Qazirgi tańda adam ólimi jáne jarylys faktisi boiynsha qylmystyq is qozǵaldy", - dedi Turǵymbaev májilis kýlýarynda.
"Kúdiktiler toby bar ma?" dep naqtylady BAQ ókilderi.
"Ázirge joq" dep jaýap berdi ministr.
Eske salaiyq, jeksenbi, 7 qarashada tańerteń Qaraǵandy oblysy Abai qalasyndaǵy shahtada metan gazy jaryldy. Apat kezinde shahtada barlyǵy 64 adam bolǵan. 56 adam óz betinshe jer betine shyqqan. Alty adam qaza tapty, taǵy ekeýi aýyr jaǵdaida aýrýhanaǵa tústi.
Bul faktige qatysty Qylmystyq kodekstiń 277-baby 3-tarmaǵy (Eki jáne odan da kóp adamnyń ólimine alyp kelgen taý jáne qurylys jumystary kezinde qaýipsizdik erejelerin buzý) boiynsha qylmystyq is qozǵaldy.
Prezident Qasym-Jomart Toqaev úkimetke qaza bolǵan kenshilerdiń otbasyna kómek kórsetýdi tapsyrdy.
