QR Ishki ister ministrliginiń Kóshi-qon qyzmeti komiteti tóraǵasynyń orynbasary Galina Sársenova QR Úkimetiniń baspasóz ortalyǵynda ótken brifingte mekenjai anyqtamasyn alyp tastaý týraly aityp berdi, dep habarlaidy "Ult aqparat" primeminister.kz saityna silteme jasap.
Mekenjai anyqtamasyn berý qyzmetin Ishki ister ministrligi kórsetetin edi. Bul qyzmet suranysqa ie qyzmetterdiń biri boldy. Tek biyldyń ózinde 9 mln mekenjai anyqtamasy berilgen.
Galina Sársenovanyń aitýynsha, bul qarjylyq júkteme de, osy qyzmetti kórsetken korporatsiia qyzmetkerleri úshin fizikalyq júkteme de boldy.
Atalǵan qyzmetti avtomattandyrý aiasynda ony usyný qajettiginiń joqtyǵyn eskere otyryp, atalǵan anyqtamany alyp tastaý týraly sheshim qabyldandy. 30 qyrkúiekte memlekettik kórsetiletin qyzmetter tizilimine túzetýler engizildi, oǵan sáikes mekenjai málimetterin berý boiynsha memlekettik qyzmet «Shekara mańy aýmaǵyndaǵy eldi mekende turǵylyqty jeri boiynsha tirkelýin rastaityn málimetterdi usyný» jańa qyzmetine almastyrylady.
«Biz nege shekara mańy aýmaqtary úshin qaldyrdyq, óitkeni, bul norma halyqaralyq kelisimshartta qarastyrylǵan. Bul – RF pen QR arasyndaǵy eldi mekenderdiń shekaralaryn kesip ótýge qatysty kelisim. Ondai eldi mekender sany 400-ge jýyq, Qazaqstan men Resei Federatsiiasynyń shekara mańy aýmaqtarynyń boiynda ornalasqan. Bul jaǵdaida mekenjai anyqtamasy usynylady, ol tek osy aýyldar úshin ǵana beriletin bolady. Iaǵni, formattyq-logistikalyq baqylaý belgilenedi», — dedi G. Sársenova.
Anyqtamany tek aýyldyq okrýgterdiń ákimderi shekara mańy eldi mekenderiniń turǵyndaryna beretin bolady. Zańnamaǵa ákimderge quzyretter berý boiynsha ózgerister engiziledi. Sonymen qatar, atalǵan aýyldardyń turǵyndary Internet jelisi qoljetimdi bolǵan jaǵdaida egov.kz elektrondy úkimet portaly arqyly mekenjai anyqtamasyn óz betinshe ala alady.
Budan basqa, bul málimetter ortalyq memleketter organdar deńgeiinde, sondai-aq memlekettik organdardyń baǵynyshty oblystyq, aýdandyq aýmaqtyq bólimsheleri úshin qoljetimdi bolady.
G. Sársenovanyń aitýynsha, kez kelgen azamat elektrondy úkimet portalyna kirip, turǵylyqty mekenjaiy boiynsha óziniń málimetterin teksere alady.
Bul rette, basqa uiymdar, onyń ishinde azamattyń tirkelýi týraly aqparat qajet bolýy múmkin jeke kompaniialar ony egov.kz elektrondy úkimet portalynan úshinshi tulǵalar servisi arqyly ala alady. Bul tek, eger azamat SMS arqyly óziniń tirkelýi týraly málimetterdi bir rettik alýǵa kelisimin bergen jaǵdaida múmkin bolady.
