Almaty oblysyndaǵy Túrgen shatqalynda bolǵan sý tasqynynan keiin demalys aimaqtarynan 58 adam, onyń ishinde 21 bala men 8 shetel azamaty qaýipsiz jerge kóshirildi, dep habarlaidy ult.kz.
Tótenshe jaǵdailar ministrliginiń málimetinshe, nóser jaýynnyń saldarynan Túrgen ózeniniń deńgeii kúrt kóterilip, Túrgen – Asy avtojolynyń birqatar ýchaskesin sý shaiyp ketken.
Sý basqan aýmaqta 17 kiiz úi ornalasqan. Sonymen qatar «Vodnik» baý-baqsha seriktestigindegi tórt aýlany sý basqan.
Qaýipsizdik maqsatynda qutqarýshylar 58 adamdy evakýatsiialaǵan. Olardyń qatarynda 21 bala jáne 8 shetel azamaty bar. Evakýatsiialanǵan azamattardy tasymaldaý úshin TJM-niń vahtalyq kóligi uiymdastyrylǵan. Vedomstvonyń málimetinshe, zardap shekkender joq.
Qazirgi ýaqytta oqiǵa ornynda qutqarýshylar táýlik boiy jumys istep jatyr. Mamandar sel qaýpine turaqty monitoring júrgizip, apat saldaryn joiý jumystaryn jalǵastyrýda.
Tótenshe jaǵdaidyń saldaryn joiýǵa TJM, jergilikti atqarýshy organdar jáne ózge de qyzmetterdiń 300-ge jýyq mamany men 44 tehnikasy jumyldyrylǵan.
Eske salaiyq, buǵan deiin Eńbekshiqazaq aýdany ákimdigi Túrgen – Asy avtojolynyń 25-shaqyrymyndaǵy jol bóligin sý basqanyn habarlaǵan bolatyn. Osyǵan bailanysty týristik nysandarda demalyp júrgen azamattardy evakýatsiialaý jumystary uiymdastyryldy.
