Nur-Sultan qalasynda alǵash ret 24 qazanda «Jahandaný jáne ulttaný úderisindegi qazaq tiliniń ómirsheńdigi» atty til forýmy ótedi. QR Mádeniet jáne sport ministrligi Til saiasaty komiteti Sh.Shaiahmetov atyndaǵy «Til-Qazyna» ulttyq ǵylymi-praktikalyq ortalyǵynyń uiymdastyrýymen ótetin forýmǵa zań, biznes, bilim, ǵylym jáne BAQ salasynyń ókilderi qatysyp, onda latyngrafikaly jańa álipbi negizinde qazaq tilin jańǵyrtýdyń ózekti máseleleri talqylanbaq. Bul týraly "Ult aqparat" ortalyqtyń baspasóz qyzmetine silteme jasap habarlaidy.
Sharanyń negizgi maqsaty jańa álipbi negizinde jańǵyrǵan qazaq tiliniń qazirgi zaman suranysyna sai ómirsheńdigin arttyrý joldaryn anyqtaý bolyp otyr. Bul rette Qazaqstan Respýblikasyndaǵy kez kelgen zań jobalaý jumystarynyń mátinin aldymen memlekettik tilde ázirleýdi uiymdastyrý, biznesti qazaqshalandyrý, bilim berý júiesin latyn álipbiine kóshirý, ǵylymdaǵy qazaq tiliniń qoldanysyn keńeitý, sapasyn arttyrý, BAQ-taǵy qazaqtildi kontent sapasyn arttyrý, jastar arasynda qazaq tilin brendke ainaldyrý máseleleri qozǵalady.
Forým barysynda, sondai-aq jańa álipbi men qazaq tilin ońai ári tiimdi jolmen úiretetin zamanaýi interaktivti quraldardyń kórmesi ótedi. Munda «Til-Qazyna» ortalyǵy ázirlegen jańa IT-jobalar tanystyrylyp, kópshiliktiń qoldanylýyna usynylady.
Budan bólek, forým aiasynda 6 sektsiia boiynsha jumys jasaityn ǵylymi konferentsiia ótkizilip, Nur-Sultan, Almaty, Shymkent qalalary men 14 óńirdegi tildik ahýaldy jaqsartý boiynsha úilesimdi jumysty josparlaýǵa arnalǵan óńirlik Til basqarmalarynyń basqosýy uiymdastyrylady.
«Is-sharanyń nátijesinde jańa álipbi emlesine qatysty jurt kókeiinde júrgen saýaldarǵa naqty jaýap beriledi. Memlekettik tildiń zańnamasyn jetildirý, biznes, ǵylym, bilim, BAQ-taǵy qazaq tiliniń qoldanysyn keńeitýge, mádenietin arttyrýǵa qatysty naqty usynystar kórsetilgen qarar qabyldanyp, jaýapty quzyrly organdarǵa jiberiledi», - delingen baspasóz baianynda.
