28-30 mamyr aralyǵynda Almaty qalasyndaǵy Sh. Ýálihanov alańynda (Ǵylym ordasynyń aldy) tuńǵysh ret ashyq aspan astynda «Almaty kitap jármeńkesi» ótedi. Úsh kúnge sozylatyn aýqymdy mádeni is-sharany Qazaqstan Respýblikasy Mádeniet jáne sport ministrligi, Ulttyq memlekettik kitap palatasy jáne Almaty qalasynyń ákimdigi uiymdastyryp otyr, dep habarlaidy "Ult aqparat".
Kitap jármeńkesine jaqyn shet elden keletin baspagerler men arnaiy delegatsiia (Qyrǵyzstan, Resei), otandyq 50-den astam baspa mekemesi men kitap dúkeni qatysady.
Búgingi tańda elimizdiń baspa isi salasy qarqyndy túrde damyp keledi. Jármeńke aiasynda jańa baǵytta, zamanaýi tehnologiialarmen shyqqan kitaptardyń tanystyrylymy ótip, avtorlar, baspagerler bas qosady.
«Almaty kitap jármeńkesiniń» maqsaty – baspa mekemeleri men kitap dúkenderiniń saýdasyn jandandyrý, kitap naryǵyndaǵy túitkildi máselelerdiń oń sheshilýine úles qosyp, kitap mádenietiniń damýyna serpin berý; oqyrman men avtor arasyndaǵy bailanysty nyǵaityp, kitap oqý mádenietin qalyptastyrý jolynda dánekerlik tanytý jáne sheteldik áriptestermen tájiribe almasý alańyn uiymdastyrý.
Jármeńke aiasynda qala turǵyndary men qonaqtary izdegen kitabyn taýyp qana qoimai, túrli mádeni is-sharalardyń kýási bolady. Aqyndar, óleńge talasy bar oqýshylar jyrdan shashý shashyp, otandyq estrada merekelik kontsert beredi. Qabyrǵaly aqyn-jazýshylar kitaptarynyń tusaýkeserin jasap, qoltańba berý rásimin ótkizedi. Qalamgerlerdiń kóshin bastaityn jazýshy Rollan Seisenbaev qoltańba berýmen qatar satylymnan túsken qarajatty qaiyrymdylyq qoryna aýdarýdy kózdep otyr. Demek, jármeńkege qatysyp, qajetti kitabyn satyp alǵan qala turǵyndary men qonaqtary qaiyrymdy iske de muryndyq bola alady.
Qonaqtar men turǵyndar arasynda túrli intellektýaldyq suraq-jaýap oiyndary oinatylyp, jeńimpazdarǵa kitap toly qorjyndar syiǵa beriledi. Jármeńkege qatysatyn baspa mekemeleri men kútip dúkenderi oqýshylar, jastar men men stýdentterge baspa ónimin arzan baǵada satyp alýǵa túrli jeńildikter jasaidy.
Ulttyq memlekettik kitap palatasyndaǵy «Sirek kitaptar men qoljazbalar murajaiynyń» eksponattary da jármeńke aiasynda kópshilik nazaryna usynylady. Munda Alash arystarynyń, ult qairatkerleriniń HIH ǵasyr sońy men HH ǵasyr basynda jaryq kórgen kitaptarynyń túpnusqasymen tanysý múmkindigi qarastyrylǵan.
Ult rýhaniiatynyń aitýly kúnderinde baspa isi, kitap saýdasy, jáne qazirgi balalar ádebietiniń damý baǵyty jóninde dóńgelek ústelder ótip, osy salanyń mamandary atalǵan máseleni jan-jaqty talqylaidy.
Kitap jármeńkesiniń ashylýyna Qazaqstan Respýblikasy Mádeniet jáne sport ministri Abaeav Dáýren Áskerbekuly, Almaty qalasynyń ákimi Dosaev Erbolat Asqarbekuly, Qazaqstan Jazýshylar odaǵy basqarmasynyń tóraǵasy Ulyqbek Esdáýlet jáne ózge de ádebiet, mádeniet salasynyń kórnekti ókilderi qatysady.
