Jýyrda Shymkent qalasynyń jáne Túrkistan oblysynyń memlekettik kúzet qyzmeti basqarmasynda Tuńǵysh Prezident kúnine orai jáne Elbasynyń «Uly dalanyń jeti qyry» maqalasynda aitylǵan máselelerdi zerdeleý maqsatynda «dóńgelek ústel» májilisi ótti.
Jiynǵa Shymkent qalasy Ál-Farabi aýdany «Nur Otan» partiiasy partiialyq baqylaý komissiiasynyń múshesi B.Tuiaqbaev, Shymkent qalalyq máslihatynyń depýtaty T.Sultanova, B.Momyshuly atyndaǵy oqý ortalyǵynyń tárbie jáne kadr bóliminiń bastyǵy A.Maimaqov qatysty.
Kúzet qyzmeti basqarmasynyń jeke quramy aldymen Memleket basshysy N.Nazarbaevtyń ár jyldardaǵy atqarǵan jumystary týraly kórmeni tamashalap, Elbasy jaily kitaptarmen tanysty.
– Memlekettiń qýaty qarý-jaraǵynyń kúshi men diplomatiialyq qarym-qatynasymen ǵana ólshenbeidi. Memlekettiń basty qarýy – mádenieti. Olai bolsa, Elbasynyń «Uly dalanyń jeti qyry» atty maqalasy osy oiymyzdy dóp basqandai. Bul «Bolashaqqa baǵdar: rýhani jańǵyrý» baǵdarlamalyq maqalasynyń jalǵasy. Atalǵan maqalada qazaq halqynyń tereńnen bastaý alatyn tarihi jáne mádeni erekshelikteri, álemdik órkenietke qosqan ózindik úlesi týraly taǵlymdy tujyrymdama jasalǵan. Prezident maqalasynda búgingi jahandaný jaǵdaiynda ulttyń biregeiligin saqtaýda halyqtyń ǵasyrlar boiy jinaqtalǵan bai tarihyn tanyp, áli de ashylmaǵan qyrlaryn zertteý qajettigin atap kórsetti. Uly dalanyń baiyrǵy halqyn ózgelerge mádenieti ejelden qalyptasqan ult retinde moiyndatý maqsatynda maqalada qundy oilar aitylyp ári ultty saqtaýdyń mehanizmi keńinen qamtylǵan, – dedi basqarma bastyǵy, politsiia polkovnigi Q.Tileýberdiev.
«Dóńgelek ústel» májilisine jinalǵandar Elbasy eńbegine bailanysty óz oilaryn ortaǵa salyp, pikir almasty.
