1 jeltoqsan - Qazaqstan Respýblikasynyń Tuńǵysh Prezidenti kúni merekesi qarsańynda Ordabasy aýdanynyń ortalyǵynda eki páterli 14 turǵyn úi tapsyryldy. Ordabasylyqtarǵa baspanany tapsyrý sharasyna Ońtústik Qazaqstan oblysynyń ákimi Janseiit Túimebaev qatysty, dep habarlaidy "Ult aqparat".
Aimaq basshysy aýdan ortalyǵy - Temirlan aýylynda «Qoljetimdi baspana - 2020» baǵdarlamasy aiasynda oblystyq biýdjet esebinen salynǵan turǵyn úilerdiń kiltin jetim jáne ata-anasynyń qamqorlyǵynsyz qalǵan balalarǵa, kezekte turǵan áleýmettik turmysy tómen otbasylarǵa tabystap, jańa qonys berekeli shańyraqqa ainalýyn tiledi.
«Barys-Tassai» JShS úilerdiń qurylysyn merziminde aiaqtap, paidalanýǵa berip otyr. Ordabasy aýdanynda barlyǵy 30 kommýnaldyq turǵyn úi bar. Mundaǵy ár úidiń sharshy metriniń jaldaý quny - 50 teńge kóleminde belgilengen.
Aita keteiik, aýdanda turǵyn úi kezeginde 243 adam tirkelgen. Olardy baspanamen qamtý maqsatynda aýdan ákimdigi kommýnaldy kópqabatty turǵyn úilerdi salý úshin tiisti jumystardy júrgizýde.
Osy kúni oblys ákimi Tórtkúl aýyl okrýgindegi Qarsybai Spataev aýylyndaǵy aýyz sý júiesiniń iske qosylý sharasyna qatysyp, aýyl turǵyndarynyń qýanyshymen bólisti.
Jańa tartylǵan sý qubyrynyń aýyl halqy úshin orasan zor qýanyshty oqiǵa ekenin alǵa tartqan óńir basshysy, oblystaǵy eldi mekenderdi taza aýyzsýmen qamtamasyz etý oblystyń damý baǵytynda atqarylatyn jumystardyń bastysy ekenin jetkizdi.
Mereke qarsańynda aýyldaǵy 136 otbasy, iaǵni 1600 turǵyn taza aýyzsýmen qamtylyp otyr. Bul nysannyń qurylysyn oblystyq biýdjet esebinen «Qurylys-servis-SK» JShS júzege asyryp, paidalanýǵa berdi. Joba qurylysyna 98 mln teńgege jýyq qarjy jumsaldy.
Jalpy aýdan kólemindegi 57 eldi mekenniń búgingi tańǵa 39-y qubyrly aýyzsýmen qamtylǵan. Iaǵni turǵyndardyń 88,7 paiyzy taza aýyzsýǵa qol jetkizgen. Aldaǵy 2020-2021 jyldary aýdandy tolyq sapaly aýyz sýmen qamtý jumystaryn aiaqtaý josparlanýda.
