Nur-Sultan qalasyndaǵy QR Qarýly Kúshteriniń Ulttyq áskeri-patriottyq ortalyǵynda VII Respýblikalyq «Aibyn-2021» áskeri-patriottyq jastar jiynynyń saltanatty jabylý sharasy ótti, dep habarlaidy QazAqparat tilshisi.
Tuńǵysh Prezident kúni men Táýelsizdiktiń 30 jyldyǵyna arnalǵan «Egemen el erteńi – jas sarbaz» atty I respýblikalyq jas patriottar forýmynyń aiasynda «Aibyn-2021» áskeri-patriottyq jastar jiynynyń qorytyndysy shyǵarylyp, jeńimpazdardy marapattaý rásimi ótti.
Sharaǵa «Jas sarbaz» respýblikalyq balalar-jasóspirimder áskeri-patriottyq qozǵalysynyń ókilderi ár aimaqtan onlain rejimde qosyldy.
Forým barysynda túrli salada óz ornyn taýyp, jemisti bilim alyp júrgen jas patriottar óz jetistikterin pash etip, usynys-tilekterin aitty. Snyń biri – Almaty oblysynyń týmasy, «Jas sarbaz» qozǵalysynyń úzdik tárbelenýshisi, boks pen dziýdodan respýblikalyq jarystardyń júldegeri, akrobat, oqý ozaty Áli Dosman.
«Men 5 jasymnan halyqaralyq jarystarǵa qatysyp, Qazaqstandy álemdik deńgeide tanystyryp júrmin. Men de el aǵalary sekildi kók týymyzdy álem arenalarynda jelbiretýdi armandaimyn», - degen jas akrobat «Jas sarbazdyń Qajymuqan kúshi» atty kórsetilim qoidy.
Forýmǵa QR Parlamentiniń depýtattary, Qorǵanys, Bilim jáne ǵylym, Tótenshe jaǵdailar, Aqparat jáne qoǵamdyq damý, Mádeniet jáne sport ministrlikteriniń, Ulttyq qaýipsizdik komitetiniń ókilderi qatysty.
Al «Aibyn» jiynyna belsendi qatysyp, áskeri-patriottyq tárbie jumystaryn sapaly uiymdastyrǵan úshin beriletin «Patriottar mekeni» aýyspaly kýbogy Túrkistan oblysyna tabystaldy.
