Astanada túngi oiyn-saýyq ornynda gaz tapanshasymen adamǵa oq atqan qala turǵyny 4 jyl 8 aiǵa bas bostandyǵynan aiyryldy. Bul týraly Astana qalasynyń prokýratýrasy habarlady, dep habarlaidy ult.kz.
Tergeý materialdaryna sáikes, sottalǵan azamat alkogol iship, gaz toltyrylǵan sharlardy tutynǵannan keiin túngi klýbta ózge kelýshilerge sebepsiz tiisip, qoǵamdyq tártipti buzǵan.
Onyń áreketine eskertý jasaǵan kelýshimen arada janjal týyndaǵan. Osy sátte kúdikti ózimen birge alyp júrgen gaz tapanshasyn shyǵaryp, jábirlenýshiniń keýde tusyna eki ret oq atqan. Saldarynan zardap shekken adam dene jaraqatyn alǵan.
Oqiǵadan keiin kúdikti oqiǵa ornynan qashyp ketken.
Sot barysynda aiyptalýshy kinásin tolyq moiyndady. Sot ony gaz qarýyn qoldana otyryp buzaqylyq jasaǵany úshin kináli dep tanyp, 4 jyl 8 ai merzimge bas bostandyǵynan aiyrý jazasyn taǵaiyndady.
Astana qalasynyń prokýratýrasy azamattardy qoǵamdyq oryndarda zań talaptaryn saqtaýǵa shaqyryp, quqyqqa qaishy áreketter úshin zańda kózdelgen jaýapkershilik mindetti túrde qarastyrylatynyn eske saldy.
