Qazir adamdar tamaǵy jybyrlap, azdap jótelse de qaýiptenip, alańdai bastaidy. Halyq óz betinshe, úi jaǵdaiynda tumaý men koronavirýs belgilerin ajyrata almaidy. Bul týraly Qazaqstan profilaktikalyq meditsina akademiiasynyń prezidenti Almaz Sharman onlain brifing barysynda aitty, dep habarlaidy QazAqparat.
«Tumaý men koronavirýstyń uqsastyǵy bar. Bul ekeýinde de álsizdik baiqalady, dene qyzýy kóteriledi, naýqas kóbine jata bergisi keledi. Bir qaraǵanda bul eki aýrýdyń simptomdary birdei jáne olardy ajyratý múmkin emes siiaqty kórinedi»,– deidi Almaz Sharman
Onyń aitýynsha, tumaý kezinde adam birneshe kúnnen keiin ózin jaqsy sezine bastaidy, al koronavirýsta kerisinshe, kún ótken saiyn jaǵdai nasharlai beredi.
«Tumaý men koronavirýsty qarapaiym adam, úi jaǵdaiynda ajyrata almaidy. Sondyqtan, qandai da bir belgileri anyqtalsa, birden meditsinalyq mekemelerge júgingenderi abzal. Keseldi indetti tek arnaiy zerthanalyq tekserý arqyly anyqtaýǵa bolady»,– dedi ol.
Sonymen qatar, ol turǵyndardy óz betinshe emdelmeýge shaqyrdy.
